Տոներն են մոտենում. ձվի գինը կրկին բարձրանում է

ԵՐԵՎԱՆ, 21 դեկտեմբերի. /Նովոստի–Արմենիա/. Հայաստանի խանութներում և սուպերմարկետներում ձվի գինն արդեն մի քանի օր է, ինչ սկսել է բարձրանալ, գրում է «Ժողովուրդը»։

Պատճառը ներքին շուկայում ձվի դեֆիցտն է, հայտնում է օրաթերթը` հղում անելով մի քանի տնտեսվարողների։

Տնտեսվարողների խոսքերով, երկու օր է, ինչ մատակարարները քիչ քանակությամբ ձու են խանութներին մատակարարում:


«Չի բացառվում, որ առաջիկա երկու օրերին որոշ խանութներում վաճառքի ձու չլինի: Բանն այն է, որ Ամանորի նախաշեմին, երբ ձվի պահանջարկը կտրուկ մեծանում է, տեղական արտադրողները, որպես կանոն, չեն կարողանում ներքին պահանջարկն ապահովել, ինչի արդյունքում էլ ձվի շուկայում դեֆիցիտ է առաջացել: Իսկ պահանջարկն ամբողջությամբ բավարարելու համար ձու պետք է ներկրվի», – նշում են հոդվածի հեղինակները` միաժամանակ ընդգծելով, որ հստակ հայտնի չէ, թե ինչն է պատճառը, որ տնտեսվարողները չեն կարողանում մեծ քանակությամբ ձու ներկրել։

Սակայն ըստ որոշ տեղեկությունների՝ սննդամթերքի անվտանգության պետական ծառայությունը կրկին դանդաղել է տնտեսվարողներին ձու ներկրելու թույլտվություն տրամադրելու հարցում, գրում է թերթը:–0–