ԵՐԵՎԱՆ, 3 մարտի. /Նովոստի–Արմենիա/. ՀՀ քննչական կոմիտեի Լոռու մարզային քննչական վարչության Ստեփանավանի քննչական բաժնում հարուցվել է քրեական գործ՝ Լոռու մարզի Գյուլագարակ գյուղի միջնակարգ դպրոցի սաների թունավորման դեպքի առթիվ, հաղորդում է ՀՀ ՔԿ մամուլի ծառայությունը։
2017 թվականի մարտի 2-ին ահազանգ է ստացվել առ այն, որ Լոռու մարզի Գյուլագարակ գյուղի միջնակարգ դպրոցի 6 աշակերտի ինքնազգացողությունը վատացել է, և տեղափոխվել են «Ստեփանավան բժշկական կենտրոն», որտեղ նրանց մոտ ախտորոշվել է «Սննդային թունավորում»:
Ահազանգի հիման վրա նյութերի նախապատրաստման ընթացքում տվյալներ են ձեռք բերվել, որ «Դպրոցական սնունդ» ծրագրի շրջանակում Գյուլագարակ գյուղի միջնակարգ դպրոցի պատասխանատու անձինք նույն օրը՝ ժամը 11-ի սահմաններում, հիշյալ դպրոցի 4-րդ դասարանի աշակերտներին սահմանված ճաշացանկով մատակարել են հաց և բրնձով ապուր, ինչն ուտելուց հետո 6 աշակերտների ինքնազգացողությունը վատացել է, և նրանք ժամեր անց՝ ժամը 18:10-ից ժամը 18:35-ն ընկած ժամանակահատվածում, տեղափոխվել են բժշկական կենտրոն։
Загружается новость ... "Лево"
Դեպքի առթիվ Ստեփանավանի քննչական բաժնում հարուցվել է քրեական գործ ՀՀ քրեական օրենսգրքի 279-րդ հոդվածի 2-րդ մասի 1-ին և 2-րդ կետերի հատկանիշներով (Անվտանգության պահանջներին չհամապատասխանող ապրանքներ թողարկելը կամ վաճառելը, աշխատանքներ կատարելը կամ ծառայություններ մատուցելը):
Քրեական գործի շրջանակում Գյուլագարակ գյուղի միջնակարգ դպրոցի 4-րդ դասարանի նշված 6 աշակերտները ճանաչվել են տուժող, իսկ նրանց ծնողները՝ որպես անչափահաս տուժողների օրինական ներկայացուցիչներ:
Քրեական գործով կատարվել է դեպքի վայրի զննություն, նշված դպրոցի ճաշարանից վերցվել են բրնձով ապուրի, տոմատի մածուկի, բրնձի և հացի նմուշներ, էական նշանակություն ունեցող մի շարք հանգամանքներ պարզելու նպատակով նշանակվել են փորձաքննություններ, հարցաքննվել մի շարք վկաններ:
Նախաքննությունը շարունակվում է: Ձեռնարկվում են անհրաժեշտ քննչական և դատավարական գործողություններ՝ դեպքի օբյեկտիվ, լրիվ և բազմակողմանի քննությունն ապահովելու ուղղությամբ: Քննության արդյունքների մասին տեղեկություն կտրամադրենք լրացուցիչ։–0–
