Գեներալ մայոր Արկադի Տեր-Թադևոսյանը՝ Կոմանդոսը, վիրահատվել է

ԵՐԵՎԱՆ, 20 հուլիսի. /Նովոստի–Արմենիա/. Արցախյան պատերազմի հերոս, գեներալ մայոր Արկադի Տեր-Թադևոսյանը՝ Կոմանդոսը, տևական ժամանակ է` չի երևում մամուլում, հարցազրույցներ չի տալիս, գրում է «Հրապարակը»։

Թերթի հաղորդմամբ` նրա բջջային հեռախոսն անհասանելի է: Մինչդեռ հատկապես ապրիլյան քառօրյա պատերազմի օրերին և դրանից հետո Տեր-Թադևոսյանին հաճախ կարելի էր տեսնել մամուլի էջերում և հեռուստատեսային տարբեր հաղորդումներում։

«Պարզվեց, որ գեներալ մայորը մոտ մեկ ամիս առաջ վիրահատության է ենթարկվել, այժմ էլ ապաքինվում է», – գրում են հոդվածի հեղինակները։

Թերթը, հղում անելով սեփական աղբյուրներին, նշում է, որ Կոմանդոսի մոտ մի խնդիր էր, որն ի հայտ է գալիս այդ տարիքի շատ տղամարդկանց մոտ։

ԴՕՍԱԱՖ-ից թերթին հայտնել են, որ Տեր-Թադևոսյանն ընդամենը մի քանի ժամով է գալիս աշխատանքի և մինչև օրվա վերջ չի մնում (գեներալ մայորը ԴՕՍԱԱՖ-ի կենտրոնական խորհրդի նախագահն է)։

Հոդվածի հեղինակներին հաջողվել է կապ հաստատել Տեր-Թադևոսյանի հետ, սակայն երբ նա իմացավ, որ զանգողը լրագրող է, խուսափեց հարցերին պատասխանելուց՝ առաջարկելով մի ժամից զանգել։

«Պայմանավորված ժամին կրկին զանգեցինք, սակայն հեռախոսն անջատված էր», – նշում են հոդվածի հեղինակները։

«Հարկ է նշել, որ Կոմանդոսը կողմ էր արտահայտվել նախկինում հայկական ուժերի վերահսկողության տակ գտնվող 800 հեկտարը հետ գրավելուն և կարծիք էր հայտնել, որ դա պետք է արվի պետական մակարդակով, այսինքն՝ հրամանը պետք է վերևից տրվի։ Նա և Ժիրայր Սեֆիլյանը ժամանակ առաջ հանդիպումներ էին ունենում և քննարկում Արցախի իրադրության վերաբերյալ խնդիրներ, մասնավորապես՝ կորսված տարածքները հետ վերադարձնելու հնարավորությունը», – գրում է թերթը։–0–