«Որևէ ուղևոր «դրսում չի մնացել» ու չի մնալու». Flyone Armenia–ն հայտարարություն է տարածել Երևան–Մոսկվա առաջին չվերթի չեղարկման կապակցությամբ

ԵՐԵՎԱՆ, 15 դեկտեմբերի./Նովոստի–Արմենիա/. Այսօր առավոտյան հայտնի էր դարձել, որ «Flyone Armenia» ավիաընկերության առաջին չվերթը՝ Երևան-Մոսկվա ուղղությամբ, չեղարկվել է։

Ավիաընկերությունը հայտարարություն է տարածել ստեղծված իրավիճակի կապակցությամբ։

«Flyone Armenia ընկերությունը հայտնում է, որ ընկերությունից անկախ հանգամանքների ի հայտ գալու (այդ թվում, ռուսական պատկան մարմինների՝ կորոնավիրուսի համաճարակին հակազդելու մտահոգությունների հետ կապված) պատճառներով, ընկերությունը ստիպված է եղել չեղարկելու Երևան-Մոսկվա-Երևան երթուղով նախատեսված դեկտեմբերի 15-ին ու 16-ին չվերթները», – նշվում է ավիաընկերության հայտարարության մեջ։

Flyone Armenia–ից նաև հայտնում են, որ ավիաընկերությունը արդեն իսկ ապահովել է նշված չվերթների բոլոր ուղևորների արագ ու անվտանգ տեղափոխման հնարավորությունը նշանակման վայրեր։

«Մեր աշխատակիցները նշված չվերթների բոլոր ուղևորների հետ մշտական և անհատական կապի մեջ են, մեր ուղևորների ավիափոխադրման ու մնացած բոլոր ծառայությունների ողջ փաթեթի պատշաճ մատուցման համար։ Որևէ ուղևոր «դրսում չի մնացել» ու չի մնալու։ Ընկերության ուղևորների սպասարկման ծառայությունը հասանելի է բոլոր ուղևորների համար ու պատրաստ է օպերատիվ կերպով լուծել հնարավոր ցանկացած խնդիր», – նշվում է հայտարարության մեջ։

Ավիաընկերությունը նաև տեղեկացնում է, որ մյուս ուղղություններով ընկերության չվերթները կատարվելու են նախօրոք հայտարարված ժամանակացույցով։

«Flyone Armenia ընկերությունը հայցում է մեր ուղևորների ներողամտությունը առաջացած անհարմարությունների համար ու հայտնում, որ ներդնում ու ներդնելու է բոլոր ջանքերը հնարավորինս սեղմ ժամկետում առկա խնդիրները հաղթահարելու ուղղությամբ», – նշվում է ավիաընկերության հայտարարության մեջ։

Նշենք, որ հայկական ԶԼՄ–ների հաղորդմամբ, «Flyone Armenia» ընկերությունը կապված է «Քաղաքացիական պայմանագիր» խմբակցության պատգամավոր Խաչատուր Սուքիասյանի ընտանիքին։–0–