Երիտասարդի նկատմամբ հետախուզում է հայտարարվել 14-ամյա աղջկա հետ սեռական հարաբերություն ունենալու մեղադրանքով

ԵՐԵՎԱՆ, 23 փետրվարի. /Նովոստի–Արմենիա/. Հայաստանում հետախուզում է հայտարարվել Լոռու մարզի բնակչի նկատմամբ 14-ամյա աղջկա հետ պարբերաբար սեռական հարաբերություն ունենալու մեղադրանքով, հաղորդում է ՀՀ քննչական կոմիտեի մամուլի ծառայությունը։ 

Նախնական քննության ընթացքում բավարար ապացույցներ են ձեռք բերվել առ այն, որ  Լոռու մարզի չափահաս բնակիչը 2015 թվականի նոյեմբերի 20-ից մինչև 2016 թվականի հունվարի 14-ը պարբերաբար սեռական հարաբերություն է ունեցել 14-ամյա աղջկա հետ:

2016 թվականի փետրվարի 20-ին որոշում է կայացվել՝ երիտասարդին ՀՀ քրեական օրենսգրքի 141-րդ հոդվածի 2-րդ մասի 1-ին և 3-րդ կետերով (սեքսուալ բնույթի գործողություններ կատարելը տասնվեց տարին չլրացած անձի հետ) որպես մեղադրյալ ներգրավելու մասին և նույն օրը միջնորդություն է ներկայացվել դատարան՝ նրա նկատմամբ որպես խափանման միջոց կալանավորումն ընտրելու մասին: Հայտարարվել է հետախուզում։

Հանձնարարություն է տրվել ոստիկանության համապատասխան ստորաբաժանումներին միջոցներ ձեռնարկել՝ հետախուզվողին հայտնաբերելու և վարույթն իրականացնող մարմնին ներկայացնելու ուղղությամբ։

Նախաքննությունը շարունակվում է:-0-