Բժիշկ. նորածին հնգյակից մեկի մահվան պատճառը խորը անհասությունն ու գլխուղեղում արյան զեղումն է

ԵՐԵՎԱՆ, 6 մայիսի. /Նովոստի–Արմենիա/. Այսօր լուսադեմին մահացել է Երևանում ծնված հնգյակներից մեկը։

«Մայիսի 3-ին Երևանում ծնված հնգյակից այսօր առավոտյան մահացած նորածինը ունեցել է խորը անհասությունից, որն էլ հարուցել է բարդացումներ՝ գլխուղեղի արյան զեղում», – նշել է «Էրեբունի» բ/կ-ի գործադիր տնօրեն Միքայել Մանուկյանը, հաղորդում է Tert.am–ը։

«Անհասության պատճառով գլխուղեղում առաջացող արյունազեղումն ամենավտանգավոր բարդացումն է, ինչն էլ բերում է նման ծանր վիճակների: Ասեմ, որ այս բարդության կանխարգելումը հնարավոր չէ, որովհետև միակ ճանապարհն այն է, որ երեխան որքան հնարավոր է շատ մնա արգանդում», - նշել էՄիքայել Մանուկյանը:

Նշենք, որ հնգյակը լույս աշխարհ էր եկել 28 շաբաթականում՝ կեսարյան հատմամբ:

Առողջապահության նախարարությունը վերջին մի քանի օրերին տարածած հաղորդագրություններում նշում էր, որ երեխաներից երկուսի վիճակը գնահատվում է ծայրահեղ ծանր:

«Մասնագետները գտնում են, որ խորը անհասության պարագայում վիճակի զարգացումների հետագա ընթացքի վերաբերյալ կանխատեսումներ անել դեռևս վաղ է», - նշված էր մայիսի 4-ի ԱՆ հաղորդագրության մեջ:

Նորածնի վիճակը սկսել է վատանալ երեկ երեկոյան, ողջ գիշեր հիվանդանոցում են եղել ՀՀ գլխավոր նեոնատալոգը, հիվանդանոցի վերակենդանացման բաժանմունքի վարիչը, տարբեր պրոֆիլի բժիշկներ:

Մայիսի 3-ին «Էրեբունի» բժշկական կենտրոնում առավոտյան ժամը 04։00-ին լույս աշխարհ էր եկել հնգյակ՝ 4 աղջիկ, 1 տղա։

Նորածինները լույս աշխարհ են եկել 600, 820, 840, 840 և 880 գրամ քաշով։ Նրանց լույս աշխարհ գալուց անմիջապես հետո ձեռնարկվել են անհրաժեշտ ռեանիմոցիոն գործողություններ։–0–