Աննախադեպ երևույթ Վանաձորի ծննդատանը. րոպեների տարբերությամբ 12 երեխա է ծնվել (ՎԻԴԵՈ)

ԵՐԵՎԱՆ, 23 հունիսի. /Նովոստի–Արմենիա/. Վանաձորի բժշկական կենտրոնի ծննդատանը հունիսի 20-21-ը՝ 24 ժամվա ընթացքում, 12 երեխա է ծնվել։

Լույս աշխարհ է եկել 6 աղջիկ և 6 տղա։

Այս հաստատության համար սա աննախադեպ ցուցանիշ է առնվազն վերջին տասը տարվա ընթացքում` հաշվի առնելով, որ ծննդատանը, տնօրենի տեղեկացմամբ, գրանցվում է օրական միջինը 3.5 ծնունդ, հաղորդում է armtimes.com–ը։

«Ծանրաբեռնվածությունն առաջին 11 ժամում է եղել` առավոտյան ժամը 11-ից մինչև երեկոյան 10:20 րոպե: Երեխաներից 9-ը ծնվել են այդ ընթացքում»,- նշել է ծննդատան տնօրեն Արամ Ավալյանն ու ավելացրել, որ ունեն 8 մանկաբարձ-գինեկոլոգ, ծննդաբերություններին մասնակցել է 4 բժիշկ` իր հետ միասին:

«Այնպես որ մենք մասնագետների կամ այլ բանի կարիք չենք զգացել», – նշել է Ավալյանը։


12 երեխաներից 3-ը լույս աշխարհ են եկել կեսարյան հատումով, մյուսները՝ բնական ճանապարհով:

Armlur–ի հաղորդմամբ, ծննդաբերություններից հետո մայրերից ոչ մեկի մոտ խնդիրներ չեն գրանցվել։ Կեսարյան հատումով ծննդաբերած մայրերը գտնվում են հետվիրահատական բաժանմունքում։ Նրանց և փոքրիկների վիճակը լավ է: Առաջինը լույս աշխարհ է եկել փոքրիկ Սոֆին: Նա ընտանիքի առաջնեկն է:

12 փոքրիկները մեկը մյուսից միջին հաշվով մեծ է 40 րոպեով:

Բժիշկների խոսքով, եղել է նաև, որ փոքրիկները լույս աշխարհ են եկել 5-10 րոպե տարբերությամբ:

Արտակարգ աշխատանքային օրն ամփոփել է փոքրիկ Լիաննան: Նա տան երկրորդ երեխան է:

12 մայրերից 10-ը Վանաձորից են, 2-ը՝ Ալավերդի քաղաքից:–0–