Երևանում կանցկացվի բողոքի ցույց` ընդդեմ միջազգային կազմակերպությունների անգործության

ԵՐԵՎԱՆ, 8 ապրիլի. /Նովոստի-Արմենիա/. Երևանում շաբաթ օրը երեկոյան կանցկացվի բողոքի ցույց` ղարաբաղա-ադրբեջանական շփման գծում իրավիճակի կտրուկ սրման կապակցությամբ  միջազգային կազմակերպությունների հանցավոր լռության դեմ:

«Կոչ ենք անում բոլորին սույն թվականի ապրիլի 9-ին ժամը 19:00 լինել Հանրապետության հրապարակում` ձեզ հետ բերելով ՀՀ, ԼՂՀ դրոշներ, մոմեր և պաստառներ», - ասվում է կազմակերպիչների հայտարարության մեջ, որոնք Facebook սոցիալական ցանցում միջոցառում են (event) ստեղծել:  

Ցույցը համընկնում է ԵԱՀԿ Մինսկի խմբի համանախագահների այցի հետ Երևան։

ՌԴ-ն մեր ռազմավարական գործընկերն է, բայց մենք դեմ ենք Ռուսաստանի կողմից Ադրբեջանին զենք վաճառելուն. Սարգսյան>>

Ցույցի կազմակերպիչները նշում են, որ Ադրբեջանի կողմից ապրիլի 2-ին ԼՂՀ սահմանի ողջ երկայնքով սանձազերծված քառօրյա պատերազմը և դրան հաջորդած փխրուն զինադադարը, մինչ այս պահը որևէ հստակություն չեն մտցրել հակամարտության կարգավորման տեսլականի մեջ։

«Ռազմական գործողությունների ընթացքում նկատվեց միջազգային հանրության և, հատկապես, հակամարտության կարգավորման գործում առաջնային ներգրավվածություն ունեցող կառույցների և երկրների մի մասի հանցավոր լռությունը կամ ոչ պակաս հանցավոր հավասարության նշան դնելը ՀՀ, ԼՂՀ և Ադրբեջանական կողմի գործողությունների մեջ», - ասվում է հայտարարության մեջ։ 

ՀՀ ՊՆ–ն հրապարակել է Արցախի մարտերում ապրիլի 2-8–ը զոհված 44 զինծառայողների անունները >>

Ապրիլի 1-ի լույս 2-ի գիշերը ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները։

Օպերատիվ տվյալներով`մարտական գործողությունների ընթացքում ոչնչացվել է 2 ուղղաթիռ, շուրջ 30 տանկ, «Գրադ» տիպի համազարկային կայանք, ծանր հրանետային համակարգ (ТОС), ինժեներական տեխնիկա,  7 անօդաչու սարք։  Ադրբեջանական զինուժը տվել է 300-ից ավելի մարդկային կորուստ:

Հայկական կողմը կորցրել է 14 տանկ, ունի 44 զոհ, մոտ 122–ը վիրավոր է, անհետ կորած է համարվում 21–ը։ Զոհվել են նաև քաղաքացիական անձինք, այդ թվում` մեկ երեխա և յոթ կամավոր։ Մարտական գործողությունները դադարեցվել են ապրիլի 5–ին մոտավորապես ժամը 12։00–ին, երբ ուժի մեջ մտան համապատասխան պայմանավորվածությունները։ -0–