Սամվել Կարապետյանի` հայկական տնտեսություն հարյուրավոր միլիոններ ներդնելու մտադրության մասին լուրերն իրականությանը չեն համապատասխանում

ԵՐԵՎԱՆ, 18 հոկտեմբերի. /Նովոստի–Արմենիա/. «Տաշիր Գրուպ» հոլդինգը հրապարակել է պաշտոնական հայտարարություն մամուլում շրջանառվող տեղեկատվության մասին, ըստ որի` ընկերության սեփականատեր, ռուսաստանաբնակ խոշոր ձեռներեց Սամվել Կարապետյանը պատրաստվում է հարյուրավոր միլիոններ ներդնել Հայաստանի տնտեսության մեջ։

«Հարկ ենք համարում տեղեկացնել, որ թե այս, թե նախկինում շրջանառության մեջ դրված համանման այլ հրապարակումները իրականության հետ ոչ մի աղերս չունեն: Դրանք առավելապես միտված են արհեստական սպասումներ առաջացնելուն: Բոլոր ծրագրերը, որոնք անցած տարիներին կյանքի են կոչվել «Տաշիր Գրուպի», «Տաշիր» բարեգործական հիմնադրամի և Կարապետյանների ընտանիքի կողմից, պատշաճ կարգով ներկայացվել են հանրությանը՝ առանց ավելորդ զգացմունքայնության և ճոռոմաբանության», – նշվում է հաղորդագրության մեջ։

Ներդրումներ են սպասվում հայկական տնտեսության մեջ>>

Հայտարարության մեջ նաև նշվում է, որ այսուհետ ևս բոլոր նախատեսվող և իրականացված ծրագրերի ու ներդրումների մասին կտրվի համապատասխան իրազեկում:

«Այնպես որ, խնդրում ենք մեր հայրենակիցներին չհավատալ այսպես կոչված «հավաստի տեղեկություններին» կամ «մեր աղբյուրներին» կատարված հղումներով հրապարակումներին և ապավինել բացառապես մեր կողմից ներկայացվող պաշտոնական տեղեկություններին», – նշվում է հաղորդագրության մեջ։

Ավելի վաղ հայկական ԶԼՄ–ներում տեղեկատվություն էր տարածվել, որ Հայաստանի կառավարության ծրագրի հաստատումից հետո Սամվել Կարապետյանը 300 միլիոն դոլարի ներդրում է կատարելու ՀՀ տնտեսության մեջ` «Հին Էրիվան» պատմամշակութային ուրույն նախագծի իրականացման համար։ –0–