ԵՐԵՎԱՆ, 31 օգոստոսի. /Նովոստի–Արմենիա/. Մոսկվան ստացել է Երևանի պաշտոնական հարցումը ՀՀ պաշտպանության նախկին նախարար Միքայել Հարությանին արտահանձնելու մասին, ով գտնվում է ԱՊՀ երկրների միջպետական հետախուզման մեջ` 2008 թ.–ի մարտի 1–ի գործով։ Այդ մասին հայտնում է Ինտերֆաքսը` հղում անելով իր աղբյուրին։
«Ռուսաստանի իրավապահ մարմինները հարցում են ստացել` Հայաստանի պաշտպանության նախկին նախարար Հարությունյանի արտահանձման վերաբերյալ, հիմա այդ հարցումը գտնվում է քննարկման փուլում», – ասել է գործակալության զրուցակիցը։
«Նախնական որոշում է կայացված, որ հարցումը կմերժվի, քանի որ հայտնի է, որ Միքայել Հարությանը 2002 թ.–ից ունի ռուսական անձնագիր», – հայտարարել է աղբյուրը` հիշեցնելով, որ ըստ ՌԴ Սահմանադրության, Ռուսաստանի քաղաքացիները չեն արտահանձնվում օտար պետություններին` այդ թվում քրեական պատասխանատվության ենթարկվելու համար։
Загружается новость ... "Лево"
Աղբյուրը չհայտնեց Հայաստանի և Ռուսաստանի իրավասու մարմինների նամակագրության մանրամասները` նշելով միայն, որ հարցումը ստացվել է Ռուսաստանում Ինտերպոլի Ազգային կենտրոնակայանի մասով։
Ավելի վաղ ՀՀ ոստիկանապետ Վալերի Օսիպյանը հայտնել էր, որ Հարությունյանը գտնվում է միջպետական հետախուզման մեջ։
«Մենք դեռ անհրաժեշտություն չենք տեսնում միջազգային հետախուզման մեջ։ Նրա գտնվելու վայրը նույնպես դեռ հայտնի չէ», – ասել էր նա լրագրողներին օգոստոսին 21–ին։
Ըստ նրա, ՀՀ նախկին նախագահ Սերժ Սարգսյանի եղբայր` Լևոնի, նրա զարմիկ Անի Սարգսյանի ու Միքայել Հարությունյանի նկատմամբ հայտարարվել էր միջպետական հետախուզում դեռ այս տարվա հուլիսին։
Պաշտպանության նախկին նախարարի կինը հայտնել էր լրագողներին, որ Հարությունյանը գտնվում է Մոսկվայում։ Ըստ հայկական ԶԼՄ–ների, նախկին նախագահի եղբայրը ու վերջինիս դուստրը նույնպես գտնվում են Ռուսաստանում։
Ընդհանուր իրավասության դատարանը հուլիսի 28–ի լույս գիշերը որոշում է կայացրել Հայաստանի երկրորդ նախագահ Ռոբերտ Քոչարյանին կալանավորել «Մարտի 1»–ի գործով։ Նա մեղադրվում է այլ անձանց հետ նախնական համաձայնությամբ սահմանադրական կարգը տապալելու համար։
Վերաքննիչ դատարանն օգոստոսի 13–ին բավարարեց Քոչարյանի փաստաբանների` կալանքի փաստը բողոքարկելու միջնորդությունը։ Միջնորդությունը բավարարվեց` հաշվի առնելով նախկին նախագահի անձեռնմխելիությունը։ Քոչարյանն ազատ արձակվեց դատարանի դահլիճից։
Հայկական ընդդիմությունը` առաջին նախագահ Լևոն Տեր–Պետրոսյանի գլխավորությամբ, ով առաջադրվել էր 2008 թ.–ի փետրվարի 19–ին կայացած նախագահական ընտրություններին և պարտվել էր, փետրվարի 20–ից Երևանի կենտրոնում անցկացնում էր հանրահավաքներ` դժգոհություն հայտնելով քվեարկության արդյունքներից։ Բողոքի ակցիաները 2008 թ.–ի մարտի 1–2–ը վերածվեցին անկարգությունների և իրավապահ ուժերի ու ցուցարարների միջև բախումների, ինչի հետևանքով զոհվեց 10 մարդ, ավելի քան 200–ը վիրավորվեց։ -0-
