ԵՐԵՎԱՆ, 2 մարտի. /Նովոստի–Արմենիա/. Հայտնի ամերիկահայ միլիարդատեր Քըրք Քըրքորյանն իր կտակում ոչ մի ցենտ չի թողել իր պատմական հայրենիքին, գրում է «Առավոտը»` հղում անելով 168.am-ին։
«Լինսի» հիմնադրամի փոխնախագահ, «Կալիֆոռնիա Կուրիեր» պարբերականի հրատարակիչ Հարութ Սասունյանի խոսքով` կեղծիք են շրջանառվող լուրերն այն մասին, թե Քըրքորյանը 200 մլն դոլար է կտակել Հայաստանին և պայման դրել, որ այդ գումարի հետ ՀՀ իշխանությունները պետք է որևէ առնչություն չունենան։
Քըրք Քըրքորյանի ժառանգությունը կբաշխվի առանց ՀՀ իշխանությունների միջամտության>>
«Այդ բոլորը կեղծիք է, ոչ մի նման նշում չկա Քըրքորյանի կտակի մեջ, մարդիկ պարզապես երևակայական խոսքեր են ասում, հնարում են, որը շատ ցավալի է ինձ համար: Այդ մարդիկ երբեք կտակը չեն տեսել և «հավաստի աղբյուրներ» են նշում, բայց եթե հավաստի լիներ, կտակը կտեսնեին և այդպիսի սուտ բաներ չէին ասի: Կտակի մեջ ո՛չ «իշխանություն» բառը կա, ո՛չ Հայաստան, ո՛չ տվեք կամ մի տվեք արտահայտությունը… լրիվ կեղծիք է։ Քըրքորյանն իր կյանքում երբեք չի զբաղվել մանրամասներով, ինքը միշտ տվել է ընդհանուր ուղղություն և իր աշխատողները, օգնականներն են գործադրում իր կտակը», – ասել է Սասունյանը։
Նրա խոսքով` Քըրքորյանը կտակել է, որ իր ամբողջ հարստությունը տալու է բարեսիրությանը՝ առանց մանրամասնելու, թե ո՞ր կազմակերպություններին, որտե՞ղ, հայկակա՞ն, թե՞ օտար կազմակերպություններին։
«Կտակին պատասխանատու կա, որը մոտ 50 տարի նրա հետ աշխատել է և շատ լավ է իմանում Քըրքորյանի մոտեցումները, նախասիրությունները և պարոն Քըրքորյանն իր ամբողջ կյանքի ընթացքում գումարներ է նվիրաբերել թե´ հայկական և թե´ օտարազգի ծրագրերի, և ես կասկած չունեմ, որ մահից հետո էլ իր փափագը նույնն է, որ իր հարստությունը գնա հայկական և ոչ հայկական բարեսիրական ծրագրերի», – ավելացրել է Սասունյանը։
«Օսկար 2016»-ի մասնակցները հարգանքի տուրք են մատուցել Քըրք Քըրքորյանի հիշատակին>>
Ամերիկահայ հայտնի գործարար Քըրք Քրքորյանը կյանքից հեռացել է 2015 թվականի հունիսի 16-ին, Լոս Անջելոսում: «Ֆորբս» ամսագրի համաձայն, Քրքորյանի ընդհանուր կարողությունը 2015 թվականի տվյալներով գնահատվել է 4,2 միլիարդ դոլար:
Նա հայտնի էր որպես Լաս Վեգասի հիմնական գործարար դեմք: 1968 թվականից Քրքորյանը սկսել է զբաղվել կինոբիզնեսով և հաջորդ տարի դարձել Metro Goldwyn Mayer (MGM) տնօրեն, որին հետագայում նա ավելացրել է United Artists-ը (1976), Columbia Pictures-ը (1980) և 20th Century Fox-ը:–0–
