ԵՐԵՎԱՆ, 5 մայիսի. /Նովոստի–Արմենիա/. Մի քանի օր առաջ ՀՀ կառավարությունը հաստատեց Վրաստանի կառավարության կողմից նվիրաբերության ծրագիրը, համաձայն որի Հայաստանի Հանրապետությանն է նվիրաբերվում ժամանակակից «Սովալդի» դեղ, որով հեպատիտ Ց-ով հազար հիվանդ բուժում կստանա, հաղորդում է ՀՀ ԱՆ մամուլի ծառայությունը։
Գերատեսչությունը նշում է, որ հեպատիտ Ց-ի դեմ պայքարը հանրային առողջապահական լուրջ խնդիր է։ Այն խիստ վտանգավոր վարակիչ հիվանդություն է թե՛ հիվանդի առողջության և կյանքի, թե՛ հանրության համար։
Համաշխարհային փորձը ցույց է տալիս, որ հեպատիտ Ց-ի դեմ պայքարի ամենաարդյունավետ ձևը հիվանդների բուժումն է։ Իսկ բուժումը հնարավոր է դարձել վերջին տարիներին հայտնաբերված սովալդի դեղի օգտագործմամբ։ Հայաստան ներմուծվում է դրա օրիգինալը։ Արտերկրում այդ դեղով մեկ հիվանդի բուժման արժեքը հասնում է մինչև 50-60 հազար ԱՄՆ դոլարի։
«Միաժամանակ, հայտնում ենք որ ծրագրի շրջանակում բուժման համար անհրաժեշտ է մինչև բուժման սկսելը, ընթացքում և բուժման ավարտից հետո իրականացնել մի շարք հետազոտություններ», – նշվում է հաղորդագրության մեջ։
Գերատեսչությունից նաև նշում են, որ նվիրատվությամբ ստացված դեղը, ըստ ցուցումների, պետք է համակցվի հավելյալ 1 կամ 2 դեղով։
Առողջապահության նախարարությունը սկսել է մշակել ծրագրի իրականացման միջոցառումներ, այդ թվում` հեպատիտ Ց-ով հիվանդ քաղաքացիների ցուցակագրում։
Առաջնահերթ կսկսվի այն քաղաքացիների բուժումը, որոնց մոտ լաբորատոր հետազոտություններով արդեն իսկ հաստատվել է հեպատիտ Ց ախտորոշումը կամ պատրաստ են իրենց միջոցներով վճարելու սույն հետազոտությունների համար։
Ծրագրի շրջանակում առաջնահերթ կընդգրկվեն նաև այն քաղաքացիները, ովքեր պատրաստ կլինեն վճարելու հավելյալ դեղերի արժեքը։
«Բոլոր հիվանդներին, ովքեր որպես հեպատիտ Ց-ով հիվանդ հաշվառված չեն իրենց պոլիկլինիկայում կամ այլ բժշկական հաստատությունում, առաջարկում ենք մինչև մայիսի 15-ը ցուցակագրվել` ամեն օր, ներառյալ` տոներին, ժամը 9-18-ը զանգահարելով 010-65-51-62 հեռախոսահամարով», – նշում է գերատեսչությունը։–0–
