Հայաստանում ավագ դասարանների աշակերտները կարող են ընտրել վերջին կիսամյակի առարկաները

ԵՐԵՎԱՆ, 12 հոկտեմբերի. /Նովոստի-Արմենիա/. ՀՀ կրթության և գիտության նախարար Լևոն Մկրտչյանը հրաման է ստորագրել` հանրակրթական ուսումնական հաստատություններում 12-րդ դասարանի ուսումնական գործընթացը կազմակերպելու ընթացակարգը հաստատելու մասին, հաղորդում է գերատեսչության մամուլի ծառայությունը:

Ընթացակարգով նախատեսվում է, որ 12-րդ դասարանի աշակերտները կարող են ըստ ցանկության ընտրել այն առարկաները, որոնք կուսումնասիրեն 12-րդ դասարանի երկրորդ կիսամյակում:

Ինչպես հայտնում է ՀՀ ԿԳՆ մամուլի ծառայությունը, ընթացիկ ուսումնական տարվա առաջին կիսամյակում` մինչև դեկտեմբերի 1-ը, ուսումնական հաստատության 12-րդ դասարանի աշակերտները գրավոր դիմում են հաստատության տնօրենին՝ ներկայացնելով 2-րդ կիսամյակում ուսումնասիրության համար իրենց կողմից ընտրված առարկաների ցանկը: Միասնական քննություններ հանձնող աշակերտները ցանկում ներառում են միասնական քննական առարկաները:

Բացի այդ, սովորողը մասնակցում է միայն իր ընտրած առարկաների դասարանային ուսումնական պարապմունքներին: Սովորողը մասնակցում է արտադասարանային ուսումնական պարապմունքներին այն դեպքում, երբ դասացուցակով նրա շաբաթական բեռնվածությունը պակաս է 31 դասաժամից:

Ավելի վաղ Կրթության և գիտության նախարարը հայտնել էր, որ Հայաստանի ավագ դպրոցների 2016-2017 ուսումնական տարում սպասվում են մեծ փոփոխություններ: Նրա խոսքով, ավագ դպրոցի էությունը նրանում է, որ 12-րդ դասարանցին, ով արդեն կողմնորոշվել է իր ապագա մասնագիտության հարցում, կարողանա նախապատրաստվել բուհի ընդունելությանը: -0-