ՀՀ ԱՆ. հիվանդանոցներում մնում է Երևանի ՊՊԾ գնդի շենքի զավթման հետևանքով վիրավորված ևս չորս մարդ

ԵՐԵՎԱՆ, 19 հուլիսի. /Նովոստի-Արմենիա/. Կիրակի ՀՀ ոստիկանության պարեկապահակային ծառայության գնդի տարածքում տեղի ունեցած միջադեպի հետևանքով տուժածներից 4 քաղաքացի շարունակում է ստացիոնար բուժում ստանալ, հայտնում է ՀՀ Առողջապահության նախարարության մամուլի ծառայությունը: Գերատեսչության տվյալներով, նախօրեին Ոստիկանության հոսպիտալացված աշխատակիցներից երկուսը դուրս են գրվել:

Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։

ԶԼՄ-ները հայտնում են Երևանում ՊՊԾ գնդի շենքի զավթման ժամանակ տուժածների ընդհանուր թիվը>>

«Էրեբունի» ԲԿ-ում մնում է երկու տուժած: «Վերակենդանացման բաժանմունքում գտնվողի վիճակը մասնագետները գնահատում են կայուն` դրական շարժընթացով։ Շնչում է ինքնուրույն, վիճակը համապատասխանում է հետվիրահատական շրջանին», - նշել են գերատեսչությունից։ Այս կեմտրոնի մյուս հիվանդի վիճակը բավարար է:

Գերատեսչությունից նշում են, որ բավարար է գնահատվում նաև ՊՆ կենտրոնական զինվորական հոսպիտալում գտնվող տուժածի վիճակը։

«Հերացի» թիվ 1 հիվանդանոցային համալիրի վերակենդանացման բաժնմունքում գտնվող տուժածի վիճակը մասնագետները գնահատում են կայուն ծանր, շնչում է արհեստական շնչառական սարքի միջոցով», - նշվում է ԱՆ հաղորդագրության մեջ։ -0-