ԶԼՄ-ները հայտնում են Երևանում ՊՊԾ գնդի շենքի զավթման ժամանակ տուժածների ընդհանուր թիվը

ԵՐԵՎԱՆ, 19 հուլիսի. /Նովոստի-Արմենիա/. «Հայկական ժամանակ» թերթը հաշվարկել է կիրակի զինված խմբավորման կողմից Երևանի ոստիկանության պահակապարեկային ծառայության գնդի շենքի զավթման ժամանակ տուժածների ընդհանուր թիվը:

Թերթի հաղորդմամբ, ՀՀ ոստիկանության պարեկապահակային ծառայության (ՊՊԾ) գնդի վրա «Սասնա ծռեր» (կալանավորված Ժիրայր Սեֆիլյանի կողմնակիցներ. խմբ) խմբավորման անդամների գրոհի հետևանքով, հոսպիտալացվել է 6 մարդ: Սակայն միջադեպից հետո առողջապահական հաստատություններ դիմած անձանց ընդհանուր թիվն ավելի մեծ է:

Դատելով առողջապահության նախարարության տարածած հաղորդագրությունից` բժիշկներին են դիմել ընդհանուր առմամբ 9 անձ, որոնցից հոսպիտալացվել է 6-ը, իսկ 3-ն անհրաժեշտ բժշկական օգնություն է ստացել ամբուլատոր պայմաններում: Սակայն, թերթի պարզած տեղեկությունների համաձայն, բուժհաստատություններ դիմած անձանց թիվը 11-ն է, որոնցից 5-ը մինչև մի քանի ժամ հիվանդանոցում գտնվելուց հետո դուրս են գրվել:

«Զինված միջադեպի հետևանքով տուժածներից երեքը տեղափոխվել են «Էրեբունի» բժշկական կենտրոն: Նրանցից մեկը ոստիկան է` 40-ամյա Տիգրան Դանիելյանը, որն արդեն հաջորդ օրը դուրս է գրվել: Երկրորդը ոստիկանության օպերատոր, 1983 թվականին ծնված Ռոբերտ Հայրապետյանն է, որը նույնպես առաջիկա մեկ-երկու օրվա ընթացքում կկարողանա տուն գնալ, իսկ երրորդը, որի վիճակն ամենածանրն է, «Սասնա ծռեր» խմբավորման 26-ամյա անդամ Թաթուլ Թամրազյանն է: Նա գտնվում է վերակենդանացման բաժանմունքում», - գրում է թերթը:

Հաղորդագրության մեջ նշվում է, որ Թամրազյանը հիմնականում բնակվում էր Ռուսաստանում և Հայաստան էր վերադարձել վերջերս: Իսկ վերակենդանացման բաժանմունքում վիրավոր Թամրազյանին հսկում են մի քանի ոստիկան:

«Եվս հինգ տուժած, այդ թվում` երկու ոստիկան, տեղափոխվել է «Սուրբ Գրիգոր Լուսավորիչ» բժշկական կենտրոն: Հոսպիտալացվել է նրանցից միայն մեկը: Խոսքը պատանդառված այն ոստիկանի մասին է, որի մոտ, ինչպես հայտարարվում էր, սրտի ու ճնշման հետ կապված խնդիրներ էին առաջացել, շտապ օգնություն էր հրավիրվել, բայց ապստամբները որոշ ժամանակ թույլ չէին տալիս նրան հիվանդանոց տեղափոխել», - գրում է թերթը:

45-ամյա ոստիկան Գագիկ Մկրտչյանը, հրազենային ծանր վնասվածքով, տեղափոխվել է Համալսարանական կլինիկական թիվ 1 հիվանդանոց: Նա վիրահատվել է և այժմ հիվանդի վիճակը ծանր է, բայց կայուն:

Եվս երկու տուժած` երկուսն էլ ոստիկանն, տեղափոխվել են ՊՆ կենտրոնական զինվորական հոսպիտալ: Հրաչ Խոստեղյանը, որը քունքի շրջանում ունեցել է հրազենային բեկորային վիրավորում, ամբուլատոր բուժօգնություն ստանալուց հետո դուրս է գրվել: Մյուս ոստիկանի` Արամ Հովհաննիսյանի մոտ առկա է հրազենային վիրավորում` որովայնի շրջանում: Նա շարունակում է ստացիոնար բուժում ստանալ:

Այսպիսով, թերթի ամփոփմամբ, «Սասնա ծռեր» խմբավորման և իրավապահների բախման հետևանքով տուժել է 11 մարդ, որոնցից 7-ը ոստիկանության աշխատակիցներ են: -0-