ԵՐԵՎԱՆ, 2 նոյեմբերի. /Նովոստի–Արմենիա/. Ազգային ժողովի արձակման անմիջապես հաջորդ օրն ու արտահերթ խորհրդարանական ընտրությունների անցկացումից շատ առաջ Հայաստանի քաղաքական դաշտում սկսեցին տեղի ունենալ տարբեր, այդ թվում` կազուսային միջադեպեր։
Այսօր` նոյեմբերի 2–ի ցերեկը, ՀՀ վարչապետի պաշտոնակատար Նիկոլ Փաշինյանի խորհրդական Մեսրոպ Առաքելյանը Facebook–յան իր էջում հետաքրքիր բովանդակությամբ գրառում կատարեց։
«Նորընտիր Ազգային Ժողովի առաջին նիստը և նոր վարչապետի նշանակումը տեղի է ունենալու դեկտեմբերի 31-ին: Նոր տարին նոր Հայաստանում», – գրել էր խորհրդականը։
Սակայն մի քանի ժամ անց այդ գրառումը ջնջվեց Facebook–ից։ Սակայն ինչպես ասվում է ինտերնետային պատվիրաններից մեկում. «ինտերնետում մեկ անգամ հայտնվածը մնում է այնտեղ ընդմիշտ»։
«Նովոստի–Արմենիա» գործակալությունը, ցանկանալով պարզաբանել իրավիճակը, փորձեց կապ հաստատել վարչապետի պաշտոնակատար Նիկոլ Փաշինյանի մամուլի քարտուղար Արման Եղոյանի հետ, սակայն նրա հեռախոսը մշտապես «անջատված էր կամ անհասանելի»։
Կենտրոնական ընտրական հանձնաժողովի մամուլի քարտուղար Հերմինե Հարությունյանն իր հերթին տեղեկացրեց, որ վարչապետի նշանակման հարցը ԿԸՀ–ի իրավասությունների մեջ չէ, իսկ առաջին նիստի անցկացման հստակ ամսաթիվը հիմա դժվար է նշել, քանի որ հնարավոր է, որ արտահերթ խորհրդարանական ընտրությունների արդյունքում ներկայացվեն բողոքարկումներ Սահմանադրական դատարան։
Նման հեռանկարի պարագայում անհնար է դառնում կանխատեսել նոր գումարման Ազգային ժողովի առաջին նիստի ամսաթիվը։–0–