ԵՐԵՎԱՆ, 26 մայիսի. /Նովոստի-Արմենիա/. Երկուշաբթի Հայաստանի մի շարք բնակավայրերում մոլեգնած ուժեղ քամուց հիմնականում վնասվել են մայրաքաղաքի շինությունները և ենթակառուցվածքները, հինգշաբթի մամուլի ասուլիսի ժամանակ հայտնեց ԱԻՆ ճգնաժամային կառավարման ազգային կենտրոնի ղեկավար Հովհաննես Խանգելդյանը:
Մայիսի 23-ին հորդառատ անձրևով ուղեկցվող ուժեղ քամին Երևանում և մի շարք շրջաններում պոկել է շենքերի տանիքներ, տապալել և արմատախիլ է արել ծառեր` ճանապարհներին խցանումներ առաջացնելով: Վնասվել են էլեկտրալարեր և գազատար խողովակներ, իսկ որոշ համայնքներում վնաս է հասցվել ցանքատարածքներին և պտղատու այգիներին:
Հայաստանին իսկական տորնադո էր սպառնում>>
«ԱԻՆ-ը ստացել է 575 ահազանգ` կապված տարածքների և ենթակառուցվածքների տարատեսակ վնասվածքների հետ, որոնցից 475-ը` Երևանում, այսինքն` հիմնական վնասը հասցվել է հենց մայրաքաղաքին», - ավելացրեց Խանգելդյանը:
Նա ընդգծեց, որ մայրաքաղաքում գրանցվել է շինությունների և շենքերի վնասման 280 դեպք, ինչպես նաև ծառերի, էլեկտրասյուների, գովազդային վահանակների տապալման 137 դեպք: Ամենից շատ տուժել է Շենգավիթ համայնքը (107 դեպք), 87 միջադեպ գրանցվել է Կենտրոնում, 62` Էրեբունիում, 60` Արաբկիրում, 57` Մալաթիա-Սեբաստիայում:
Խանգելդյանը նշեց, որ համակարգված աշխատանքի շնորհիվ էլեկտրամատակարարումը վերականգնվել է շատ սեղմ ժամկետում։
Հայաստանը դեռ երկար ժամանակ կգտնվի ցիկլոնի ազդեցության ներքո. Հայպետհիդրոմետ>>
Նա ավելացրեց, որ քաղաքացիները ևս ակտիվ մասնակցել են վնասների հետևանքները վերացնելու գործին: Նա ընդգծեց, որ ուժեղ քամու հետևանքով տուժել է մեկ մարդ:
«Ուժեղ քամիները նորմալ երևույթ են այս սեզոնի համար: Մարտից մինչև հունիս գրանցվում է քամու արագության ավելացում: Խնդիրն այն է, որ մեր բնակիչները հաշվի չեն առնում այդ գործոնը», - նշեց նա: -0-
