Հինգշաբթի` հուլիսի 11–ի առավել ուշագրավ նորությունները

08:00

12 Հուլիսի 2019

ԵՐԵՎԱՆ, 12 հուլիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է հինգշաբթի` հուլիսի 11–ի առավել ուշագրավ նորությունների իր տարբերակը։

Վարչապետ Նիկոլ Փաշինյանը հինգշաբթի կառավարության նիստից առաջ հայտնեց, որ 2020 թվականի հունվարի 1-ից Հայաստանում 10 տոկոսով կբարձրանան կենսաթոշակները: «Նախօրեին կառավարության դռնփակ նիստում հաստատվել է 2020-2022 թվականների միջնաժամկետ ծախսերի ծրագիրը: Կարող ենք մի քանի արձանագրում անել: Այդ քննարկման շրջանակներում որոշում կայացվեց, որ 2020 թվականի հունվարի 1-ից Հայաստանում 10 տոկոսով կբարձրանան կենսաթոշակները», - ասաց Փաշինյանը:

ՀՀ վարչապետ Նիկոլ Փաշինյանը հինգշաբթի կառավարության նիստից առաջ անդրադարձել է օրերս գրանցված ողբերգական ՃՏՊ–ներին, որոնց հետևանքով Հայաստանի քաղաքացիներ են մահացել։ «Բոլորդ գիտեք, որ ոստիկանությունում նոր օրենքի նախագիծ է մշակվել, որի հիմնական նպատակը կարգազանց վարորդներին ընդհանրապես երթևեկությունից հեռացնելն է։Այսինքն այն վարորդները, ովքեր պարբերաբար և չարամիտ խախտումներ են թույլ տալիս, պետք է երթևեկությունից ընդհանրապես հեռացվեն։ Նախագիծն Ազգային ժողովում է, և կարծում եմ` մենք Ազգային ժողովի հետ պետք է քննարկենք, թե ինչ ժամկետներում կարող ենք հնարավորինս շուտ այդ նախագիծն ընդունել», – նշեց ՀՀ վարչապետը։

Հայաստանի վարչապետ Նիկոլ Փաշինյանն Արթուր Գոյունյանին նշանակել է ՀՀ քրեակատարողական ծառայության պետ։ Այդ մասին որոշումը տեղադրվել է կառավարության կայքում: Մինչև նշանակումը Գոյունյանը զբաղեցրել է ՀՀ ՔԿ Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի պետի պաշտոնը:

ՀՀ կառավարությունը մտադիր է մեկ ծրագրի շրջանակում լուծել Սպիտակի ավերիչ երկրաշարժի տուժածների բնակարանային խնդիրը: Այդ մասին հինգշաբթի կառավարության նիստից առաջ հայտնեց վարչապետ Նիկոլ Փաշինյանը: «Մենք կլուծենք քաղաքացիների բնակարանային խնդիրը, որոնց նկատմամբ դե յուրե ամրագրված են պետության պարտականությունները: Այդ նպատակով կհատկացվի 3 մլրդ դրամ (մոտ 6,2 մլն դոլար)», - ասաց Փաշինյանը:

Մի շարք հայ դիավանագետներ նկատողություն են ստացել սոցցանցերում շփման կանոնների խախտման համար, «Նովոստի–Արմենիա» գործակալությանը հայտնեց ԱԳՆ մամուլի քարտուղար Աննա Նաղդալյանը։ -0-

Ծանոթացեք լուրերին առաջինն ու քննարկեք դրանք մեր Telegram-յան ալիքում

#Հայաստան #լուրեր #ամփոփում

Թեմատիկ նյութեր