Ոստիկանության հետ քաշքշուկ Երևանում ֆուտբոլի երկրպագուների բողոքի ակցիայի ժամանակ (ՏԵՍԱՆՅՈՒԹ)

ԵՐԵՎԱՆ, 24 նոյեմբերի. /Նովոստի–Արմենիա/. Ոստիկանության հետ քաշքշուկ է տեղի ունեցել First Armenian Front (FAF) ֆան–շարժման ակցիայի ընթացքում։ Նշենք, որ շարժման մասնակիցները պահանջում են Հայաստանի ֆուտբոլի ֆեդերացիայի նախագահ Ռուբեն Հայրապետյանի հրաժարականը։

Հավաքականի խաղից դժգոհ երկրպագուները երեքշաբթի անցկացրին իրենց երկրորդ ակցիան, առաջինն անցկացվել է նոյեմբերի 16–ին։

Երկրպագուները ցանկանում էին պաստառ փակցնել ՀՖՖ–ի շենքի ճաղավանդակին, սակայն ոստիկանները խոչընդոտել են դրան, ինչն էլ քաշքշուկի պատճառ է դարձել։

Ակցիայի տասնյակ մասնակիցներ պահանջում են ոչ միայն ֆեդերացիայի ղեկավարի հրաժարականը, այլ նաև ՀՖՖ գործադիր կոմիտեի լուծարումը։

Ի սկզբանե, FAF–ի հիմնական պահանջներն էին`ազգային հավաքական հրավիրել արտերկրից «խարիզմատիկ, տիտղոսակիր և անվանի մարզիչի», հավաքական վերադարձնել այնպիսի ֆուտբոլիստների, ովքեր կկարողանան արդյունավետ խաղ ցույց տալ։ Մյուս պահանջը տոմսերի գների իջեցումն է։ -0-