The Guardian-ը հայ ֆուտբոլիստ Վահան Բիչախչյանին ներառել է լավագույն երիտասարդ տաղանդների ցանկում

ԵՐԵՎԱՆ, 6 հոկտեմբերի. /Նովոստի-Արմենիա/. «Շիրակ» ֆուտբոլային ակումբի խաղացող Վահան Բիչախչյանը, ըստ հանրաճանաչ բրիտանական The Guardian պարբերականի, ներառվել է 2016 թ.-ի 60 երիտասարդ տաղանդների ցուցակում:

Վարկանիշային աղյուսակում ներառվել են աշխարհի տարբեր երկրների ֆուտբոլիստներ, ովքեր ծնվել են 1999 թ.-ին:

Բիչախչյանը սկսել է խաղալ «Շիրակ» ակումբում 16 տարեկանում` փոխարինման դուրս գալով վրացական Գորիի «Դիլա» ակումբի դեմ պատասխան հանդիպման ժամանակ Եվրոպա լիգայի որակավորման առաջին փուլում: Բիչախչյանը դարձավ գոլի հեղինակ և օգնեց իր թիմին անցնել հաջորդ փուլ:

Ինչպես նշում է պարբերականը, երիտասարդ հայ ֆուտբոլիստը հանդես է գալիս աջ կիսապաշտպանի դիրքում և նրա խաղաոճը նման է «Մանչեսթեր Սիթիի» խաղացող Քևին դե Բրեյնեի ոճին: «Նա «սուր աչք» ունի և միշտ պատրաստ է մենամարտել մրցակցի հետ», - նշում է պարբերականը: -0-