Բաքվում անցկացվող Եվրոպական խաղերի բացման արարողության ժամանակ հայկական պատվիրակության դրոշակակիրը կլինի ՀՕԿ–ի գլխավոր քարտուղարը

ԵՐԵՎԱՆ, 11 հունիսի. /Նովոստի–Արմենիա/. Բաքվում անցկացվող Եվրոպական խաղերի բացման արարողության ժամանակ հայկական պատվիրակության դրոշակակիրը կլինի ՀՕԿ–ի գլխավոր քարտուղար Հրաչյա Ռոստոմյանը, ֆեյսբուքյան իր էջում հրել է Հայաստանի հավաքականի մամուլի քարտուղար Կարեն Գիլոյանը։

Նա հայտնել է, որ հինգշաբթի Բաքու է ժամանել Հայաստանի մարզական պատվիրակության ևս մի խումբ, որի կազմում են հունահռոմեական ոճի ըմբիշներ Ռոման Ամոյանը, Միհրան Հարությունյանը, Կարապետ Չալյանն ու Մաքսիմ Մանուկյանը:

«Նրանք արդեն հասցրել են մարզվել` բասկետբոլ են խաղացել»,– նշեց նա։

Ուրբաթ օրը Երևանի ժամանակով ժամը 19։00–ին կկայանա Առաջին Եվրոպական Ամառային խաղերի բացման հանդիսավոր արարողությունը:

«Հայաստանը շքերթին կմասնակցի 7 հոգանոց խմբով, մեր Եռագույնն էլ կտանի Պատվիրակության ղեկավար Հրաչյա Ռոստոմյանը»,– ասաց Գիլոյանը։

Ավելի վաղ Գիլոյանն ասել էր, որ հայ մարզիկների առաջին խումբը երեկվանից արդեն Բաքվի մարզական քաղաքում է։ Նրա խոսքով` այնտեղ է նաև Շվեդիայի հավաքականը, որի կազմում նույնպես կան հայեր, իսկ հարևանությամբ գտնվում են Գերմանիայի, Ֆինլանդիայի, Պորտուգալիայի, Շվեյցարիայի, Թուրքիայի և Հունգարիայի հավաքականները։

Եվրոպական առաջին խաղերը, որոնք հետագայում անցկացվելու են չորս տարին մեկ անգամ, կանցկացվեն Բաքվում հունվարի 12–28–ը։ 20 մարզաձևում անցկացվող մրցումների ընթացքում կխաղարկվի մեդալների 253 կոմպլեկտ։ Սպասվում է, որ մրցումներին կմասնակցի ավելի քան 6 հազար մարզիկ` մայրցամաքի բոլոր երկրներից։-0-