«Բարսելոնայի» ղեկավարությունը երբեք խարդախություն չի կատարել. Բարտոմեու

ԵՐԵՎԱՆ, 13 փետրվարի. /Նովոստի–Արմենիա/. «Բարսելոնայի» նախագահ Հովսեփ Մարիա Բարտոմեուն դատարանում հերքել է հարձակվող Նեյմարի տեղափոխման ձևակերպման ժամանակ հարկեր չվճարելու մեղադրանքները, ասվում է ֆուտբոլային ակումբի պաշտոնական կայքում։

Նախորդ շաբաթ հայտնի է դարձել, որ Բարտոմեուն կասկածվում է 2.8 միլիոն եվրո գումարի հարկերի չվճարումից։ Դատական նիստը կայացել է ուրբաթ։

«Դատավոր Պաբլո Ռուսի առջև իր հայտարարությունում նախագահ Բարտոմեուն ներկայացրել է իրեն տրված բոլոր հարցերի բացատրությունները,– ասվում է հաղորդագրության մեջ։ – Նա ընդգծել է տվյալ գործով ընդունված բոլոր որոշումների ճիշտ լինելը, և այդ որոշումները միշտ համաձայնեցվել են ակումբի հարկային խորհրդատուների հետ։ Նա նաև հասկացրել է, որ ո՛չ ինքը, ո՛չ ակումբի մյուս ղեկավարներից որևէ մեկը երբեք մտադրություն չեն ունեցել խաբելու պետական գանձապետարանին»։

Ավելի վաղ դատախազ Խոսե Պերալսը դիմել էր դատարան «Բարսելոնայի» և նախկին նախագահ Սանդրո Ռոսելի`  իսպանական գանձապետարանից Բրազիլիայի հավաքականի հարձակվողի տեղափոխումը կատալոնական ակումբ տեղափոխվելիս 9.1 միլիոն եվրո թաքցնելը քննելու խնդրանքով։ Դրանից հետո դատավոր Ռուսն ակումբին խարդախության մեղադրանք է ներկայացրել, հաղորդում է ՌԻԱ Նովոստին։

«Բարսելոնան» ավելի ուշ հայտարարել է, որ Իսպանիայի հարկային ծառայություններին 13.5 միլիոն եվրո է վճարել բրազիլացի հարձակվողի տեղափոխման համար։ Նեյմարի տեղափոխումը կատալոնացիների համար արժեցել է 57.1 միլիոն եվրո, որոնցից 17.1 միլիոնը բաժին է հասել խաղացողի նախկին ակումբին` «Սանտոսին», մյուս 40 միլիոնը` Նեյմարի ծնողների ընկերությանը։

Իսպանացի դատախազները, որոնց գնահատմամբ Նեյմարի տեղափոխումը կատալոնացիների համար արժեցել է 94.8 միլիոն եվրո, «Բարսելոնային» և Ռոսելին երկու դրվագով հարկային խարդախության մեղադրանք են ներկայացրել։ -0-