ՖԻՖԱ–ի նախագահի պաշտոնի թեկնածու Լուիշ Ֆիգուն վեց ֆեդերացիայի աջակցություն է ստացել

ԵՐԵՎԱՆ, 30 հունվարի. /Նովոստի–Արմենիա/. Ֆուտբոլի միջազգային ֆեդերացիայի (ՖԻՖԱ) նախագահի պաշտոնի թեկնածու, պորտուգալացի Լուիշ Ֆիգուն տեղեկացրել է, որ ստացել է ՖԻՖԱ–ի անդամ վեց ազգային ֆեդերացիաների աջակցությունը։

Չորեքշաբթի հայտնի է դարձել, որ Մադրիդի «Ռեալ» և «Բարսելոնա» ակումբների նախկին կիսապաշտպան Ֆիգուն մտադիր է ՖԻՖԱ–ի նախագահի պաշտոնի համար մրցել կազմակերպության գործող ղեկավար Յոզեֆ Բլատերի հետ։ Թեկնածությունների առաջադրման պայմաններից մեկը առնվազն հինգ ֆուտբոլային ասոցիացիաների աջակցությունն է, որոնք ՖԻՖԱ–ի անդամ են։

«Ուրախությամբ հաստատում եմ, որ ՖԻՖԱ–ն այս շաբաթ վերջնաժամկետից շուտ ծանուցում է ստացել վեց ֆեդերացիաների աջակցության մասին։ Կցանկանայի աջակցության համար շնորհակալություն հայտնել իմ ընկերներին և գործընկերներին ֆուտբոլային ասոցիացիաներից, որոնք առաջադրել են իմ թեկնածությունը և ֆուտբոլային ընտանիքի մյուս ներկայացուցիչներին», – գրել է պորտուգալացին Twitter–ի իր միկրոբլոգում, հաղորդում է ՌԻԱ Նովոստին։ 

Ֆիգուից և Բլատերից բացի, իրենց թեկնածությունն են առաջադրել ՖԻՖԱ–ի նախկին գլխավոր քարտուղար Ժերոմ Շամպանը, Հորդանանի արքայազն Ալի բին Ալ–Հուսեյնը, Նիդեռլանդների թագավորական ֆուտբոլային միության (KNVB) ղեկավար Միքայել վան Պրաագն ու Ֆրանսիայի հավաքականի նախկին ֆուտբոլիստ Դավիդ Ժինոլան։

Թեկնածուների առաջադրման վերջնաժամկետը հունվարի 29–ն էր, սակայն ՖԻՖԱ–ի հատուկ հանձնաժողովը թույլատրում է, որ առաջադրման համար անհրաժեշտ բոլոր փաստաթղթերը կարող են ստացվել այդ ամսաթվից ուշ։ ՖԻՖԱ–ի նախագահի ընտրությունները տեղի կունենան մայիսի 29–ին։ –0–