Հայաստանի բատուտի առաջին առաջնությունն է անցկացվել Երևանում

ԵՐԵՎԱՆ, 22 դեկտեմբերի. /Նովոստի–Արմենիա/. Հայաստանի բատուտի առաջին առաջնությունն է անցկացվել Երևանում, «Նովոստի–Արմենիա» գործակալությանն ասաց մարմնամարզիկ, Բատուտի ֆեդերացիայի նախագահ, Գինեսի ռեկորդների գրքի եռակի ռեկորդակիր Դավիթ Ֆահրադյանը։

Միջոցառմանը, որը կայացել է Մ.Սեբաստացի անվան կրթահամալիրում, մասնակցել են ավելի քան 65 պատանի մարզիկներ` 50 տղա և 15 աղջիկ։

«Սա անկախ Հայաստանի պատմության մեջ բատուտի առաջին առաջնությունն է»,– ասաց Ֆահրադյանը։

Ըստ նրա` այդ մրցումների էությունը հավաքական թիմերի ձևավորումն է, որոնց հնարավորություն է ընձեռվում հաջորդ տարի մասնակցելու միջազգային մրցումների։

«Բատուտի վրա ցատկերը 10 տարրերից բաղկացած վարժությունների կատարում է։ Բոլոր վարժությունները կգնահատվեն տասը միավորանոց սանդղակով` կախված կատարած վարժությունների բարդությունից»,– նշեց Ֆահրադյանը։

Մրցողների շարքում, մարզիկի խոսքով, կան առանձնահատուկ շնորհալի երեխաներ, ովքեր մեծ ապագա ունեն։

Ֆահրադյանը նաև ավելացրեց, որ ֆեդերացիան գործում է արդեն երրորդ տարին, և կա Հայաստանում այդ մարզաձևը մասսայականացնելու մեծ ցանկություն, որը դրական ազդեցություն է գործում երեխաների առողջության վրա։ -0-