«Չելսիի» նախկին մարզիչ Աբրահամ Գրանտը գլխավորել է Գանայի ֆուտբոլի հավաքականը

ԵՐԵՎԱՆ, 27 նոյեմբերի. /Նովոստի–Արմենիա/.  Գանայի ֆուտբոլի հավաքականի նոր գլխավոր մարզիչն իսրայելցի մասնագետ Աբրահամ Գրանտն է, հայտնում է Ռոյթերսը։

59–ամյա մարզչի հետ պայմանագիրը ստորագրվել է 2 տարի և 3 ամիս ժամկետով։ Նա այդ պաշտոնում փոխարինել է Քվեսի Ապիային, ով սեպտեմբերին ազատվել է պաշտոնից Բրազիլիայում աշխարհի առաջնության ժամանակ թիմի անհաջող ելույթից հետո, երբ գանացի ֆուտբոլիստները չկարողացան դուրս գալ խմբից, հայտնում է ՌԻԱ Նովոստին։

Ավելի վաղ ԶԼՄ–ները հաղորդում էին, որ Գանայի ֆուտբոլի ասոցիացիայի հետ ունեցած պայմանագրով Գրանտը միանվագ 200 հազար դոլար կստանա, իսկ նրա ամսական աշխատավարձը կկազմի 50 հազար դոլար։

2007-2008 թվականներին Գրանտը գլխավորում էր «Չելսին», և այդ ժամանակ դարձավ երկրորդն Անգլիայի առաջնությունում ու հասավ Չեմպիոնների լիգայի եզրափակչին, որտեղ «կապույտները» զիջեցին «Մանչեստեր Յունայթեդին»։ Բացի այդ, նա մարզում էր անգլիական «Վեսթ Հեմը» և «Պորտսմուտը», Բելգրադի «Պարտիզանը», ինչպես նաև մի շարք իսրայելական ակումբներ։ -0-