ԵՐԵՎԱՆ, 15 հոկտեմբերի. /Նովոստի–Արմենիա/. Ալբանիայի հետ նախատեսված ֆուտբոլային հանդիպումը տապալելու համար Սերբիան «որևէ պատասխանատվություն» չի կրում, հայտարարել է Սերբիայի արտգործնախարար Իվիցա Դաչիչը։
Եվրոպայի առաջնության ընտրական փուլի շրջանակում երեքշաբթի Բելգրադում անցկացվող խաղը դադարեցվել է առաջին խաղակեսից հետո, քանի որ դաշտի վրա հայտնվել է ոչ մեծ անօդաչու թռչող սարք, որին ալբանական նշանագրերով և այսպես կոչված Մեծ Ալբանիայի քարտեզով պաստառ է ամրացված եղել։ Դաշտում և տրիբունաներում իրարանցում է սկսվել։
Սերբիայի ՆԳՆ տեղեկացմամբ` միջադեպը հրահրել է Ալբանիայի վարչապետի` Էդի Ռամայի եղբայրը` Օլսի Ռաման, ով մարզադաշտի VIP հատվածից հեռակառավարման վահանակի միջոցով կառավարել է սարքը։ Ոստիկանությունը ձերբակալել է խուլիգանին և հարցաքննել։ Այնուհետև նրան ազատ են արձակել։ Խաղի հաշիվը մնացել է 0:0։
Ինչպես լրագրողներին է հայտնել Դատիչը, ԵՄ դիվանագետները ողջ նախորդ օրվա ընթացքում ճնշում են գործադրել, որպեսզի տոմս չունեցող և ավելի ուշ սադրանք հրահրող ալբանացի երկրպագուները մտնեն մարզադաշտ։ Սերբական իրավապահները ցանկացել են նրանց ձերբակալել դեռ Բելգրադի օդանավակայանում։
«Նման բան որևէ ֆուտբոլային մրցախաղի ժամանակ չի եղել, սա պատրաստվել է նախօրոք։ Ինձ համար գլխավոր հարցն այն է, թե ինչպես պետք է արձագանքեն Եվրամիությունն ու ՈւԵՖԱ–ն, քանի որ եթե որևէ մեկը Սերբիայից բարձրացներ «Մեծ Սերբիայի» դրոշը Տիրանայում կամ Պրիշտինայում, ապա այդ հարցն արդեն ՄԱԿ–ի անվտանգության խորհրդի օրակարգում կլիներ»,– ասել է արտգործնախարարը։
Նրա գնահատականով` հատկապես խնդրահարույց է այն փաստը, որ միջադեպը հրահրել է Ալբանիայի վարչապետի եղբայրը, ով այստեղ պետք է հյուրի կարգավիճակով լիներ։
«Այս ամենը կատարվածը տեղափոխում է քաղաքական հարթություն, սա քաղաքական սադրանք է»,– ասել է Դաչիչը։-0-
