Հայաստանի հունահռոմեական ըմբշամարտի հավաքականի մարզիչը գոհ է իր սաների ելույթից եվրոպական առաջնությունում

ԵՐԵՎԱՆ, 9 ապրիլի. /Նովոստի–Արմենիա/. Հայաստանի հունահռոմեական ըմբշամարտի հավաքականի մարզիչ Լևոն Ջուլֆալակյանը հայտարարեց, որ գոհ է իր սաների ելույթից եվրոպական առաջնությունում, որն անցկացվել է ֆիննական Վանտաա քաղաքում ապրիլի 1–ից 6–ը։

Ազատ ոճի հայ ըմբիշները եվրոպական առաջնությունում երեք մեդալ են նվաճել` մեկ արծաթե և երկու բրոնզե։ Եվրոպայի եռակի չեմպիոն է դարձել Արթուր Ալեքսանյանը (98 կգ)։ Երկրորդ տեղում է 2012 թվականի Օլիմպիական խաղերի արծաթե մեդալակիր Արսեն Ջուլֆալակյանը։ Ընդհանուր թիմային ստուգարքում հավաքականը զբաղեցրել է 7–րդ տեղը 37 երկրների շարքում։

«Մեր հավաքականը լուրջ արդյունք ցույց տվեց։ Կարելի է ասել, որ առաջնությունը հաջողված էր ինչպես հունա–հռոմեական ոճի, այնպես էլ ազատ ոճի ըմբիշների համար»,– չորեքշաբթի մամուլի ասուլիսում հայտնեց Ջուլֆալակյանը։

Մինչև 70 կգ քաշային կարգում երկրորդ տեղը զբաղեցրել է Գրիգոր Գրիգորյանը, երրորդը` Գարիկ Բարսեղյանը (57 կգ) և Մուսա Մուտրազալիևը (86 կգ)։ Ընդհանուր թիմային ստուգարքում Հայաստանի ազատ ոճի ըմբշամարտի հավաքականը զբաղեցրել է 6–րդ տեղը 31 երկրների թվում։

Ջուլֆալակյանը միաժամանակ նշեց, որ ոչ բոլոր ակնկալիքներն են արդարացել, քանի որ մարզիչները հույս ունեին Ֆինլանդիայից ավելի մեծ թվով մեդալներ բերել։

Նա մասնավորապես նշեց, որ մինչև 59 կգ քաշային կարգում հանդես եկող Կարեն Ասլանյանը 1/8 եզրափակչում զիջեց բուլղարացի Ալեքսանդր Կոնստանտինովին մրցավարների սխալի և կողմնակալության պատճառով։ Նա ավելացրեց, որ հայկական կողմը պատրաստվում է այդ հարցով բողոք ներկայացնել ՖԻԼԱ (Ըմբշամարտի միավորված ոճերի միջազգային ֆեդերացիա)։
Խոսելով եզրափակչում ռուս Ալեքսանդր Չեխիրկինին պարտված Արսեն Ջուլֆալակյանի անհաջող ելույթի մասին` մարզիչը նշեց, որ հայ մարզիկը պարտվեց անուշադրության պատճառով։

Նա հայտնեց նաև, որ հավաքականի անդամներն ակտիվ պատրաստվում են աշխարհի առաջնությանը, որը կանցնի սեպտեմբերին Տաշքենդում։ Գլխավոր մրցումներից առաջ հունահռոմեական ոճի ըմբիշները հավաքներ կանցկացնեն Հայաստանում, Բելառուսում և Իտալիայում, ելույթ կունենան մի շարք միջազգային մրցաշարերում։ -0-