Արթուր Աբրահամը մտադիր է վերադարձնել բռնցքամարտի աշխարհի չեմպիոնի տիտղոսը

Գերմանիայի դրոշի ներքո հանդես եկող հայ բռնցքամարտիկ, աշխարհի նախկին չեմպիոն Արթուր Աբրահամը համոզված է, որ կվերադարձնի աշխարհի չեմպիոնի տիտղոսը, «Նովոստի-Արմենիա» գործակալությանը տեղեկացրեց մարզիկի մամուլի քարտուղար Սիրան Գրիգորյանը:

Այդ մասին Աբրահամը հայտարարել է 23-ամյա արգենտինացի բռնցքամարտիկ Պաբլո Ֆարիասի հետ կայանալիք մենամարտի նախաշեմին, որը կկայանա հունվարի 14-ին Գերմանիայի Օֆենբուրգ քաղաքի «Բադեն Արենա» մարզահամալիրում:

Գրիգորյանը նշել է, որ Ֆարիասը 19 մենամարտ է ունեցել և որևէ պարտություն չի կրել:

«Չեմ կարող թերագնահատել Ֆարիասի հնարավորությունները, նա ուժեղ մարզիկ է, ով մինչև հիմա պարտություն չի կրել: Միաժամանակ համոզված եմ, որ 2012 թվականը ինձ համար հաղթանակների սկիզբ կդառնա: Ես իմ առջև մեծ նպատակ եմ դրել՝ կրկին նվաճել աշխարհի չեմպիոնի տիտղոսը», - մեջբերել է Գրիգորյանն Աբրահամի խոսքերը:

«Խոստանում եմ, որ բռնցքամարտի սիրահարները հունվարի 14-ին դիտարժան մենամարտ կտեսնեն», - մեջբերել է մամուլի քարտուղարը բռնցքամարտիկի խոսքերը: Դեկտեմբերի կեսին Աբրահամը մինչև 2014 թ.-ը երկարաձգել է Sauerland Event փրոմոութերական ընկերության հետ կնքած պայմանագիրը:

Արթուր Աբրահամը (Ավետիք Աբրահամյան) ծնվել է Հայաստանում, հանդես է գալիս գերմանիայի դրոշի ներքո: Նա 2005-2009 թթ.-ին միջին քաշային կարգում IBF վարկածով աշխարհի չեմպիոն է եղել: Իր կարիերայի ընթացքում անցկացրել է 35 մենամարտ՝ հաղթելով 32-ում և պարտվելով 3 մենամարտում:-0-