Լևոն Արոնյանին մեկ քայլ է բաժանում Տալի հուշամրցաշարում հաղթանակից

ԵՐԵՎԱՆ, 25 նոյեմբերի./Նովոստի-Արմենիա/. Հայ գրոսմայստեր Լևոն Արոնյանը Միխայիլ Տալի հուշամրցաշարի միանձնյա առաջատարն է մրցաշարի ավարտից մեկ փուլ առաջ, հաղորդում է armchess.am-ը:

Նա գլխավորել է մրցաշարային աղյուսակը նախօրեին ութերորդ փուլում ռուս շախմատիստ Պյոտր Սվիդլերի նկատմամբ հաղթանակ տանելուց հետո: Հինգշաբթի տեղի ունեցած մնացած հանդիպումներն ավարտվել են ոչ-ոքի արդյունքով:

Այսպիսով, մրցաշարի ավարտից մեկ փուլ առաջ Արոնյանը վաստակել է 5 միավոր, նվազագույն տարբերությամբ նրան են հետևում նորվեգացի Մագնուս Կառլսենը, ռուսներ Յան Նեպոմնյաշչին, Սերգեյ Կարյակինը և ուկրաինացի Վասիլի Իվանչուկը: Մեկ միավոր պակաս է վաստակել հնդիկ Վիշվանաթան Անանդը, ռուս շախմատիստներ Սվիդլերն ու Վլադիմիր Կրամնիկը վաստակել են 3,5-ական միավոր, 3-ական միավորով եզրափակում են մրցաշարային աղյուսակը ԱՄՆ-ն ներկայացնող Խիկարու Նակամուրան և իսրայելցի Բորիս Գելֆանդը:

Նոյեմբերի 16-25-ը Մոսկվայում ընթացող Տալի վեցերորդ հուշամրցաշարն ունի մասնակիցների ամենաբարձր միջին վարկանիշը (2776 միավոր) և համարվում է ամենահեղինակավորը, դասվում է բարդության XXII կատեգորիային:-0-