Ջերմեյն Թեյլորի նկատմամբ Արթուր Աբրահամի տարած հաղթանակը տպավորություն է գործել գերմրցաշարի մասնակիցների վրա

ԵՐԵՎԱՆ, 19 հոկտեմբերի. /Նովոստի-Արմենիա/. Ջերմեյն Թեյլորի նկատմամբ՝ Գերմանիայի դրոշի ներքո հանդես եկող Արթուր Աբրահամի հաղթանակը տպավորություն է գործել Super Six World Boxing բռնցքամարտի գերմրցաշարի մասնակիցների վրա, հաղորդում է Boxingscene.com կայքը:

Կիրակի գիշերը Աբրահամը 12-րդ ռաունդում նոկաուտի ենթարկեց միջին քաշային կարգում աշխարհի նախկին չեմպիոն Ջերմեյն Թեյլորին:

«Ես զարմացած եմ: Աբրահամը թույլ էր տալիս Թեյլորին մոտենալ իրեն մի քանի ռաունդների ընթացքում, իսկ հետո պարզապես ջախջախեց նրան: Ակնհայտ է, որ Աբրահամը կարող է հզոր հարված հասցնել», - BoxingScene.com կայքը մեջբերում է միջին քաշային կարգում WBA վարկածով աշխարհի չեմպիոն Միքքել Քեսլերի խոսքերը:

Իսկ Թեյլորը հայտարարել է, որ զարմացած է Աբրահամի աջ ձեռքի հուժկու հարվածից:

«Նա ուղղակի զարմացրեց ինձ իր աջ ձեռքի հարվածով...», - հայտարարել է Թեյլորը:

Ինչ վերաբերում է հաղթողին, ապա Աբրահամը նշել է, որ նրան պահանջվեց ընդամենը մի քանի ռաունդ՝ Թեյլորին հաղթելու միջոցը գտնելու համար:

«Ինձ պահանջվեց մի քանի ռաունդ՝ իմ հակառակորդին վերլուծելու համար: Այնուհետև ես թույլ տվեցի նրան հարվածներ կատարել, որպեսզի հոգնի, իսկ հետո ջախջախեցի նրան», - հայտարարել է նա:

«Super Six World Boxing Classic» բռնցքամարտի գերմրցաշարը կազմակերպել է Showtime ամերիկյան ընկերությունը: Գերմրցաշարին կմասնակցի վեց բռնցքամարտիկ՝ աշխարհի չեմպիոններ Արթուր Աբրահամը, Միկել Կեսլերը, Կառլ Ֆրոչը, ինչպես նաև միջին քաշային կարգում աշխարհի նախկին չեմպիոն Ջերմեյն Թեյլորն ու մեծ հույսեր ներշնչող Անդրե Դիրելն ու Անդրե Ուորդը:

.Մրցաշարը մեկնարկել է 2009 թ.-ի հոկտեմբերին և կշարունակվի մինչև 2011 թ.-ի գարուն-ամառ: Բռնցքամարտիկները կխաղարկեն պատկառելի մրցանակային ֆոնդ, որը կարող է կազմել 50 միլիոն դոլար:

Մրցաշարը կանցկացվի երեք փուլով: Առաջին փուլում բռնցքամարտիկներից յուրաքանչյուրը մեկ տարվա ընթացքում կհանդիպի երեք հակառակորդների հետ: Առաջին շրջանի ժամանակ կմենամարտեն Կառլ Ֆրոխ-Անդրե Դիրել, Ջերմեյն Թեյլոր – Արթուր Աբրահամ, Միկել Կեսլեր-Անդրե Ուարդ զույգերը: Յուրաքանչյուր հանդիպումից հետո մրցաշարային աղյուսակում բռնցքամարտիկները կստանան միավորներ՝ 2 միավոր հաղթանակի, 1 միավոր ոչ-ոքիի և 0 միավոր պարտության դեպքում: Եվս մեկ բոնուսային միավոր կտրվի, եթե հաղթանակն իրականացվի նոկաուտով: Մենամարտերը կանցկացվեն ինչպես ԱՄՆ-ում, այնպես էլ Եվրոպայում:

Աբրահամը հաջորդ մենամարտը կանցկացնի Անդրե Դիրելի հետ 2010 թ.-ի հունվարին ԱՄՆ-ում:-0-