«Super Six World Boxing Classic» բռնցքամարտի գերմրցաշարի շրջանակներում՝ ամերիկացի բռնցքամարտիկ Ջերմեյն Թեյլորի և Գերմանիայի դրոշի ներքո հանդես եկող հայ բռնցքամարտիկ Արթուր Աբրահամի մենամարտը տեղի կունենա հոկտեմբերի 17-ին Բեռլինում, հաղորդում է Fightnews կայքը:
Տեղեկատվության մեջ նշվում է, որ Team Sauerland և Anschutz Entertainment ընկերությունները վերջնականապես պայմանավորվել են միջին քաշային կարգում IBF վարկածով աշխարհի նախկին չեմպիոն Արթուր Աբրահամի և միջին քաշային կարգում աշխարհի նախկին բացարձակ չեմպիոն Ջերմեյն Թեյլորի միջև մենամարտի անցկացման ամսաթվի և վայրի կապակցությամբ: Այդ բռնցքամարտիկների հանդիպումը տեղի կունենա հոկտեմբերի 17-ին Բեռլինի O2 արենայում: Ավելի վաղ տեղեկացվում էր այն մասին, որ այդ մենամարտը տեղի կունենա հոկտեմբերի 10-ին:
«Super Six World Boxing Classic» բռնցքամարտի գերմրցաշարը կազմակերպել է Showtime ամերիկյան ընկերությունը: Գերմրցաշարին կմասնակցի վեց բռնցքամարտիկ՝ աշխարհի չեմպիոններ Արթուր Աբրահամը, Միկել Կեսլերը, Կառլ Ֆրոչը, ինչպես նաև միջին քաշային կարգում աշխարհի նախկին չեմպիոն Ջերմեյն Թեյլորն ու մեծ հույսեր ներշնչող Անդրե Դիրելն ու Անդրե Ուորդը:
Մրցաշարը մեկնարկում է 2009 թ.-ի հոկտեմբերին և կտևի մինչև 2011 թ.-ի գարուն-ամառ: Բռնցքամարտիկները կխաղարկեն պատկառելի մրցանակային ֆոնդ, որը կարող է կազմել 50 միլիոն դոլար:
Մրցաշարը կանցկացվի երեք փուլով: Առաջին փուլում բռնցքամարտիկներից յուրաքանչյուրը մեկ տարվա ընթացքում կհանդիպի երեք հակառակորդների հետ: Առաջին շրջանի ժամանակ կմենամարտեն Կառլ Ֆրոխ-Անդրե Դիրել, Ջերմեյն Թեյլոր – Արթուր Աբրահամ, Միկել Կեսլեր-Անդրե Ուարդ զույգերը: Յուրաքանչյուր հանդիպումից հետո մրցաշարային աղյուսակում բռնցքամարտիկները կստանան միավորներ՝ 2 միավոր հաղթանակի, 1 միավոր ոչ-ոքիի և 0 միավոր պարտության դեպքում: Եվս մեկ բոնուսային միավոր կտրվի, եթե հաղթանակն իրականացվի նոկաուտով: Մենամարտերը կանցկացվեն ինչպես ԱՄՆ-ում, այնպես էլ Եվրոպայում:
Առաջին փուլից հետո ավելի շատ միավորներ հավաքած չորս բռնցքամարտիկները դուրս կգան կիսաեզրափակիչ, ինչից հետո զույգերի հաղթողները կմենամարտեն եզրափակչում:-0-
