ԵՐԵՎԱՆ, 22 սեպտեմբերի. /Նովոստի-Արմենիա/. Երևանում ամփոփվել են հայ լրագրողների շրջանում սեղանի թենիսի մրցույթի արդյունքները, երկուշաբթի «Նովոստի-Արմենիա» գործակալությանը հայտնեցին «Հույսի կամուրջ» հասարակական կազմակերպությունից։
Տղամարդկանց մրցապայքարում հաղթող ճանաչվեց Արսեց Թամազյանը Հանրային հեռուստաընկերությունից, երկրորդ տեղը գրավեց Սամվել Ջինանյանը «Երկիր մեդիա» հեռուստաընկերությունից, երրորդը` Հանրային հեռուստաընկերությունը ներկայացնող Էդուարդ Քալանթարյանը:
Կանանց պայքարում հաղթեց Մարինե Կարապետյանը «Երկիր մեդիա» հեռուստաընկերությունից, երկրորդ և երրորդ տեղերը գրավեցին համապատասխանաբար Կարինե Աբելյանը և Էմմա Հակոբյանը, ովքեր ներկայացնում էին «Հայոց աշխարհ» օրաթերթը:
Սեղանի թենիսի մրցույթին մասնակցեցին նաև «Նովոստի-Արմենիա» միջազգային տեղեկատվական գործակալության թղթակիցներ Սաթի Սարգսյանն ու Էլեոնորա Արարատյանը, ում, ի դեպ, հաջողվեց անցնել մրցույթի առաջին կիսաեզրափակիչ։
Մրցաշարը, որն անցկացվեց «Հայաստան» մարզական միության շենքում, նվիրված էր Հայաստանի Հանրապետության՝ սեպտեմբերի 21-ին տոնվող անկախության օրվան։
Միջոցառման անցկացման հիմնական նպատակը հաշմանդամների իրավունքների պաշտպանության խնդիրների վրա ուշադրություն հրավիրելն էր։ Մրցաշարին մասնակցելու հայտ էին ներկայացրել հաշմանդամության խնդրով զբաղվող 5 հասարակական կազմակերպությունների և 8 լրատվամիջոցների 30 ներկայացուցիչ:
Մրցաշարի կազմակերպիչը «Առաքելություն-Արևելք» միջազգային կազմակերպությունն էր՝ Դանիայի միջազգային զարգացման գործակալության աջակցությամբ։ --0--
