Երևանում ամփոփվել են Համահայկական չորրորդ խաղերի արդյունքները

Երևանում ամփոփվել են անցած կիրակի ավարտված Համահայկական չորրորդ խաղերի արդյունքները։

Օգոստոսի 18-26-ը անցկացվեցին 10 մարզաձևի մրցումներ. ֆուտբոլ, ֆուտզալ, բասկետբոլ, վոլեյբոլ, բադմինտոն, լող, թեթև աթլետիկա, թենիս, սեղանի թենիս։

Խաղերին մասնակցած 95 քաղաքներից մեդալներ նվաճեց 25 պատվիրակություն։ Առավելագույն թվով մեդալներ են նվաճել Երևանի, Վանաձորի, Գյումրիի, Լոս-Անջելեսի, Գլենդելի, Թեհրանի և Կիևի պատվիրակությունները։

Բացի դրանից, հաղթողներ սահմանվեցին չորս հատուկ անվանակարգերում. «արդար խաղ», «սպորտային ոգի», «լավագույն պատվիրակություն» և «Համահայկական չորրորդ խաղերի ամենագեղեցիկ մասնակիցը»։

«Արդար խաղ» անվանակարգում հաղթանակ տարավ Լոս-Անջելեսի վոլեյբոլի տղամարդկանց թիմը, «սպորտային ոգի» անվանակարգում՝ Կահիրեի բասկետբոլի տղամարդկանց թիմը, լավագուն պատվիրակություն ճանաչվեց Ստամբուլի պատվիրակությունը։ Համահայկական չորրորդ խաղերի ամենագեղեցիկ մասնակից ճանաչվեց Գայանե Թունյանը Երևանից։

Խաղերի փակման հանդիսավոր արարողության ընթացքում Հայաստանի վարչապետ Սերժ Սարգսյանը պարգևատրվեց «Համահայկական չորրորդ խաղերի կազմակերպման և անցկացման գործում ունեցած ներդրման համար» շքանշանով։

Համահայկական խաղերի համաշխարհային կոմիտեի որոշմամբ՝ Համահայկական հինգերրորդ ամառային խաղերը տեղի կունենան 2011 թ.-ին՝ Երևանում։

Բացի այդ, որոշում է ընդունվել անցկացնել Համահայկական ձմեռային խաղեր։  

Համահյակական խաղերի բացման հանդիսավոր արարողությունը տեղի է ունեցել օգոստոսի 18-ին՝ Երևանի Վազգեն Սարգսյանի անվան Հանրապետական մարզադաշտում։ Խաղերին մասնակցում էր աշխարհի 95 քաղաքների 2,5 հազ մարզիկ։ Առաջին Համահայկական խաղերը տեղի են ունեցել 1999 թ.-ին ՝ Հայաստանում, երկրորդը՝ 2001 թ.-ին, երրորդը՝ 2003 թ.-ին։ Չորրորդ Համահայկական խաղերի խորհրդանիշն է ընտրվել դարչնագույն «Արջուկը»։-0-