Մխիթարյանը Եվրո 2016-ի արդյունքների մասին` չեմ կարող ասել, թե շատ վշտացած եմ

ԵՐԵՎԱՆ, 19 հոկտեմբերի. /Նովոստի-Արմենիա/. Հայաստանի ֆուտբոլի հավաքականի և Դորտմունդի «Բորուսիայի» հարձակվող Հենրիխ Մխիթարյանը, խոսելով Եվրոպա 2016-ի արդյունքների մասին, ասել է, որ այդքան էլ վշտացած չէ` հաշվի առնելով հայկական թիմի հավաքած միավորները:

«Մեր երազանքը Եվրոպայի և աշխարհի առաջնությանը մասնակցելն է: Բայց ինչ արած... Ասել, թե շատ վշտացած եմ, չեմ կարող, չէ՞ որ, այս փուլում ընդամենը երկու միավոր ենք հավաքել: Իսկ ահա երկու կամ չորս տարի առաջ, երբ հնարավորություն ունեինք անցնելու խոշորագույն մրցաշարեր, իսկապես ցավալի էր»,- ասել է Մխիթարյանը sport-express.ru-ին տված հարցազրույցում:

Պատասխանելով այն հարցին, թե, արդյո՞ք, այժմ բոլոր հույսերը Ռուսասատանում 2018 թվականին կայանալիք Աշխարհի առաջնության հետ են, Հայաստանի հավաքականի առաջատար խաղացողը պատասխանել է. «Տա Աստված, որ լավ պատրաստվենք կարևորագույն խաղերին` մինչև ընտրական փուլը դեռ մեկ տարի ունենք: Կարծում եմ` հաջողության համար մի քիչ էլ պետք է «բախտներս բերի»»:

Հայաստանի հավաքականը վերջին տեղն է զբաղեցրել Եվրոպայի առաջնության ընտրական փուլում` ութ հանդիպումներից հետո հավաքելով երկու միավոր:
--0--