Հայ ծանրորդուհի Հռիփսիմե Խուրշուդյանը` Եվրոպայի կրկնակի չեմպիոն

ԵՐԵՎԱՆ, 16 ապրիլի. /Նովոստի-Արմենիա/. Նորվեգիայում ավարտին մոտեցող ծանրամարտի Եվրոպայի առաջնությունում Հայաստանը հերթական ոսկին նվաճեց:

Կանանց +75կգ քաշային կարգում Եվրոպայի ուժեղագույն ծանրորդուհի ճանաչվեց Հռիփսիմե Խուրշուդյանը, հայտնում է armsport.am-ը:

Ըստ հաղորդման, պոկում վարժությունում Խուրշուդյանը 113 կգ-ով գրավեց առաջին տեղը: Նույնքան կիլոգրամ էր բարձրացրել նաև Վրաստանը ներկայացնող Անաստասիա Հոտֆրիդը, սակայն անձնական քաշով Հռիփսիմեն ավելի թեթև էր, ուստի նա արժանացավ փոքր ոսկե մեդալի:

Հրում վարժությունում Խուրշուդյանը եւս լավագույնն էր 137 կգ արդյունքով:
Երկամարտի 250կգ արդյունքով Հռիփսիմե Խուրշուդյանը դարձավ Եվրոպայի չեմպիոն, իսկ Հայաստանը 3-րդ ոսկե մեդալը նվաճեց Եվրոպայի 2016թ. առաջնությունում:
Ավելի վաղ նման հաջողության էին հասել Անդրանիկ Կարապետյանը եւ Նազիկ Ավդալյանը:

Այս քաշային կարգում ելույթ ունեցավ նաև Հայաստանի մեկ այլ ներկայացուցիչ՝ 17-ամյա Արփինե Դալալյանը: Երկամարտի արդյունքում 213 կգ և Արփինեն զբաղեցրեց 6-րդ հորիզոնականը:

Հռիփսիմե Խուրշուդյանը 2-րդ անգամ դարձավ Եվրոպայի չեմպիոն: Առաջին անգամ նա նման պատվի արժանացել էր 2007 թվականին, երբ ոսկե մեդալ էր նվաճել 75կգ քաշայինների պայքարում: -0-