ՖԻՖԱ–ն չի որակազրկի Պլատինիին և Բլատերին երկար ժամանակով. հայ փորձագետ

ԵՐԵՎԱՆ, 17 նոյեմբերի. /Նովոստի–Արմենիա/. ՖԻՖԱ–ի ղեկավար Յոզեֆ Բլատերը և Ֆուտբոլի միջազգային ֆեդերացիայի փոխնախագահ, ՈՒԵՖԱ–ի ղեկավար Միշել Պլատինին չեն որակազրկվի երկար ժամանակով, կարծում է հայտնի հայ մարզական մեկնաբան Մենուա Մեհրաբյանը։

«Ակնհայտ է, որ այս ամբողջ պատմությունն ուղղված է Բլատերին և Պլատինիին իրենց պաշտոններից հեռացնելուն։ Իմ կարծիքով, Բլատերի և Պլատինիի որակազրկումների վերաբերյալ որոշում չի կայացվի»,– ասաց Մեհրաբյանը «Նովոստի–Արմենիա» գործակալությանը` մեկնաբանելով հնարավոր որակազրկումների մասին հայտնված տեղեկությունը։

ՖԻՖԱ–ն կհայտարարի Բլատերի և Պլատինիի երկարամյա որակազարկումների մասին>>

Ըստ նրա, առաջիկայում ՖԻՖԱ–ի նախագահի նոր ընտրություններն են, և Բլատերի բոլոր հակառակորդներն արդեն աշխատում են Պլատինիի դեմ, ով ի սկզբանե համարվել է համաշխարհային ֆուտբոլի ղեկավարի գլխավոր թեկնածու։

ՖԻՖԱ–ի ղեկավարի պաշտոնին հավակնում է հինգ մարդ` ՈՒԵՖԱ–ի գլխավոր քարտուղար Ջանի Ինֆանտինոն, Հորդանանի արքայազն Ալի բին ալ Հուսեյնը, ՖԻՖԱ–ի գլխավոր քարտուղարի նախկին տեղակալ Ժերոմ Շամպանը, Ֆուտբոլի ասիական համադաշնության նախագահ Սալման բին Իբրահիմ ալ Հալիֆան և ՀԱՀ բնակարանաշինության նախարար և Նելսոն Մանդելայի համախոհ Տոկիո Սեքսվալեն։

Պլատինիի թեկնածությունը ՖԻՖԱ–ի ընտրական հանձնաժողովը չի դիտարկի մինչև բոլոր պատժամիջոցների հանելը։ -0-