Հենրիխ Մխիթարյանը հայտարարել է, որ այլևս հանդես չի գալու Հայաստանի հավաքականում և խոստացել է «ամեն ինչ պատմել»

ԵՐԵՎԱՆ, 7 մարտի./Նովոստի–Արմենիա/. Հայաստանի հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը չի պատրաստվում վերադառնալ հավաքական։

«Ես չեմ զղջում իմ որոշման համար: Ես միշտ սառը գլխով և հանգիստ սրտով եմ կայացրել իմ որոշումները»,- ասել է նա Proffootball-ին տված հարցազրույցում՝ պատասխանելով այն հարցին, թե արդյոք կցանկանա՞ վերադառնալ ազգային հավաքական։

Ընդունելով, որ ազգային հավաքականից հեռանալու որոշումն իր համար հեշտ չի եղել` ֆուտբոլիստը նշել է, որ ավելի լավ է «կարիերան մեկ քայլ շուտ ավարտել, քան երկու քայլ ուշ»։

«Սա այն դեպքն է, երբ ես հասկացա, որ ժամանակը եկել է։ Մանրամասները, միգուցե, կպատմեմ կարիերայի վերջում։ Չնայած այն հանգամանքին, որ դա բոլորին, ամենայն հավանականությամբ, հիմա է հետաքրքրում, բայց ավելի լավ կլինի, եթե այդ մասին խոսենք ավելի ուշ, ես ամեն ինչ կասեմ, ամեն ինչ կպատմեմ»,- ասել է նա։

Միաժամանակ Մխիթարյանը հաջողություն է մաղթել Հայաստանի հավաքականին և հաջողություններ առաջիկա հանդիպումներում, հատկապես՝ Թուրքիայի հետ։

«Եկել է ժամանակը, որ երիտասարդ սերունդը պատասխանատվություն ստանձնի և կարողանա իր հետևից տանել ազգային հավաքականը։ Վերջին մի քանի խաղերը դժվարությամբ տրվեցին, բայց նոր մարզչի գալով, հուսով եմ, ամեն ինչ կստացվի, և մեր տղաները հանդես կգան մեծ պատվով ու պատասխանատվությամբ», – ասել է նա։–0–