Արման Ծառուկյանը պահպանել է առաջատարի դիրքը UFC-ի վարկանիշում
ԵՐԵՎԱՆ, 23 հունվարի․/Նովոստի–Արմենիա/․ Հայ մարտիկ Արման Ծառուկյանը պահպանել է իր առաջատարի դիրքը UFC-ի հունվարյան վարկանիշում (թեթև քաշային կարգ՝ մինչև 70 կգ), որը հրապարակվել է կազմակերպության կայքում։
Երկրորդ տեղը զբաղեցնում է բրազիլացի Չարլզ Օլիվեյրան, իսկ երրորդն ամերիկացի Ջասթին Գեյջին է։
UFC-ի թեթև քաշային կարգում գոտու ներկայիս սեփականատերը ռուս Իսլամ Մախաչևն է՝ UFC-ի առաջին համարը՝ անկախ քաշային կարգերից (P4P)։
Չկայացած մենամարտի մասին
Հունվարի 19-ի գիշերը Լոս Անջելեսում պետք է կայանար Ծառուկյան-Մախաչև մենամարտը, սակայն մեջքի վնասվածքի պատճառով հայ մարտիկը ստիպված է եղել դուրս գալ պայքարից։
Նրան փոխարինել է բրազիլացի Ռենատո Մոյկանոն, ում առաջին իսկ ռաունդում Մախաչևը հաղթել է խեղդող հնարքով՝ պաշտպանելով չեմպիոնական գոտին։
UFC-ի նախագահ Դանա Ուայթն ավելի ուշ հայտարարել է, որ Ծառուկյանը կորցրել է տիտղոսային մենամարտի իրավունքը և պետք է անցկացնի ևս մեկ մենամարտ՝ հավակնելու չեմպիության մենամարտին։
Ծառուկյանը համաձայնել է Ուայթի հետ. «Երբ մեջքս բուժվի, ես պատրաստ կլինեմ ապացուցել, որ գլխավոր հավակնորդն եմ՝ մենամարտելով ցանկացածի հետ, ում կդնեն իմ առջև», - գրել է նա սոցցանցերում։
Նրա խոսքով, Չարլզ Օլիվեյրայի հետ հինգ ռաունդանոց մենամարտն ամենախելամիտն է։
