ԵՐԵՎԱՆ, 4 սեպտեմբերի. /Նովոստի–Արմենիա/. 31-րդ ամառային Օլիմպիական խաղերի փոխչեմպիոններ, ծանրորդներ Սիմոն Մարտիրոսյանը և Գոռ Մինասյանը լրագրողների հետ հանդիպման ժամանակ խոսել են Օլիմպիական խաղերի մասին:
Սիմոն Մարտիրոսյանը, մասնավորապես, նշել է, որ շատ հպարտ է և ուրախ, կարողացել է առաջինը մեդալ նվաճել Հայաստանի համար:
«Ընտանիքիս անդամները շատ ուրախ էին, ինչը բնական է: Իսկ ահա Էջմիածնում ես արժանացա «Էջմիածնի բարեկամ» մեդալին: Օլիմպիական խաղերում իհարկե կարող էի և պետք է բարձրացնեի վերջին մոտեցումս, բայց ես գոհ եմ իմ այս արդյունքից», –նշել է Մարտիրոսյանը։
Ծանրորդ Սիմոն Մարտիրոսյանը դարձավ Օլիմպիական խաղերի արծաթե մեդալակիր>>
Նա նաև ավելացրել է, որ մեծ ակնկալիքներ ունի արդեն Տոկիո-2020-ից։
«Եթե Աստծո կամքով ամեն ինչ լավ լինի և վնասվածքներ չստանանք, ապա այնտեղ ևս մեդալներ ենք ունենալու», – ընդգծել է Մարտիրոսյանը։
Գոռ Մինասյանն իր հերթին նշել է, որ մեծ տպավորութուններով է վերադարձել Օլիմպիական խաղերից, քանի որ շատ երկար է պատրաստվել Խաղերին:
«Կարծում եմ բոլորի հույսերն արդարացրեցինք: Ամբողջ աշխարհը տեսավ, որ Հայաստանի պես փոքր երկրի մարզիկները ինչի են ունակ: Մեկ ոսկի և երեք արծաթ մեդալ նվաճելով՝ Հայաստանը մեծ նվաճում ունեցավ», – նշել է Մինասյանը։
Ծանրորդ Գոռ Մինասյանը բերեց Հայաստանին երրորդ օլիմպիական արծաթը>>
Նա նաև ավելացրել է, որ Պարոն Ծառուկյանի կողմից տրված տունը նվեր չէ։
«Դա իմ աշխատանքի արդյունքն է: Ես այդ տունը ստացել եմ Օլիմպիական խաղերում գրանցած իմ արդյունքի համար: Քիչ բան չեմ արել մեր երկրի համար և արժանի էի դրան: Մենք միայն շնորհակալ ենք Պարոն Ծառուկյանին, որ գնահատում է կատարած աշխատանքը», – նշել է Մինասյանն ու ավելացրել, որ այս խաղերում իրեն հաջողվել է անձնական ռեկորդներ գրանցել:
«Կարծում եմ առավելագույնն էր, որ կարող էի անել: Արդեն սկսել ենք մարզումները և հիմա ավելի պարտավորված ենք մարզվում Տոկիո-2020-ի համար», – եզրափակել է Մինասյանը։–0–
