Մուտկոն մեկնաբանել է ՖԻՖԱ–ի հետ Ռուսաստանի գաղտնի գործարքի մասին տեղեկությունները

ԵՐԵՎԱՆ, 30 հոկտեմբերի. /Նովոստի–Արմենիա/. ՌԴ սպորտի նախարար Վիտալի Մուտկոն հայտարարել է, որ Ռուսաստանի և ՖԻՖԱ–ի միջև «որևէ համաձայնություն» չի եղել ֆուտբոլի 2018 թ.–ի աշխարհի առաջնության հյուրընկալ երկրի ընտրությունների ժամանակ։ «Ջենթլմենական համաձայնության» մասին պատմել է ՖԻՖԱ–ի նախագահ Յոզեֆ Բլատերը։

Մեկնաբանելով Բլատերի հարցազրույցը, որի ժամանակ ՖԻՖԱ–ի` ֆուտբոլից ժամանակավորապես հեռացված ղեկավարը պատմել է «ջենթլմենական համաձայնության» մասին 2018 և 2022 թթ.–ի աշխարհի առաջնության հյուրընկալ երկրների ընտրության ժամանակ, Մուտկոն հայտարարել է, որ «ցանկացած մարդ այդ հարցազրույցն իր ձևով է մեկնաբանում աշխարհի առաջնության իրավունքը ստանալու համատեքստում» (ՌԻԱ Նովոստիի մեջբերում)։

«Ռուսաստանի ոչ մեկի հետ դավադրություն չի կազմակերպել։ Այս ամենը սուտ է։ Չի եղել, չկա և չի լինի», – ՌԴ սպորտի նախարարի խոսքերը մեջբերում է Ինտերֆաքսը։

Միաժամանակ սպորտի նախարարն ու Ռուսաստանի ֆուտբոլի միության ղեկավարը նշել է, որ նա համաձայնության է եկել «միայն ինքն իր հետ` մեկ ձայն»։

Մուտկոյի կարծիքով` «Արևմուտքը, երբ ձեռնտու է, ասում է, որ Ռուսաստանը բոլորի հետ ընկերական հարաբերությունների մեջ է, իսկ երբ ձեռնտու չէ, ասում է, որ մեր ընկերները միայն Իրանն ու Սիրիան են», հաղորդում է РБК–ն։

Ավելի վաղ ՖԻՖԱ–ի նախագահ Յոզեֆ Բլատերը Financial Times–ին տված հարցազրույցում նշել է, որ աշխարհի 2018 և 2022 թթ.–ի առաջնությունների հյուրընկալ երկրների ընտրության որոշումը «բանավոր կերպով համաձայնեցված է եղել»։ Այն նախատեսել է, որ քվեարկության ժամանակ նախապատվությունը տրվելու է երկու գերտերություններին` Ռուսաստանին և ԱՄՆ–ին։

Բլատերի խոսքով, ըստ ՖԻՖԱ–ի ղեկավարության միջև ձեռք բերված «ջենթլմենական համաձայնության», աշխարհի 2018 թ.–ի առաջնության անցկացման իրավունքը պետք է ստանար Ռուսաստանը, իսկ 2022 թ.–ի առաջնության անցկացման իրավունքը` ԱՄՆ–ն (արդյունքում, այդ իրավունքը փոխանցվեց Քաթարին)։–0–