Համահայկական VII ամառային խաղերը տեղի կունենան Արցախում

ԵՐԵՎԱՆ, 1 հունիսի. /Նովոստի–Արմենիա/. Համահայկական VII ամառային խաղերը տեղի կունենան Լեռնային Ղարաբաղի Հանրապետությունում, հաղորդում է ՀԱՕԿ լրատվության բաժինը։

Հայաստանի ազգային օլիմպիական կոմիտեի նորակառույց «Օլիմպավան»-ում տեղի է ունեցել «Համահայկական Խաղերի Համաշխարհային Կոմիտե» հասարակական կազմակերպության Գործադիր կոմիտեի նիստը:

Նիստի ընթացքում ՀԽՀԿ նախագահ Իշխան Զաքարյանն առաջարկել է Համահայկական VII ամառային խաղերն անցկացնել Արցախում:

Առաջարկը մեծ ոգևորությամբ է ընդունվել բոլոր ներկաների կողմից:

«Սա պատմական որոշում կլինի` մեր գաղափարների իրագործման հիմքն է: Այս որոշումն իրապես կարտացոլի մեր նպատակը` «Հայաստան-Արցախ-Սփյուռք» եռամիասնությունը»,- նշել է Զաքարյանը:

Գործադիր կոմիտեի անդամները միաձայն ընդունել են Համահայկական VII ամառային խաղերն Արցախում անցկացնելու հարցը։ Բացի այդ, քննարկել են նաև Արցախում անցկացվելիք խաղերի կազմակերպչական աշխատանքների հետ կապված խնդիրները, դրանց լուծման տարբերակները:

ՀԽՀԿ գործկոմի նիստում քննարկվել է նաև Համահայկական II ձմեռային խաղերի անցկացման հարցը: Արդյունքում որոշում է կայացվել Համահայկական II ձմեռային խաղերն անցկացնել 2018թ. փետրվարին` Ծաղկաձորում:

Համահայկական առաջին ամառային խաղերն անցկացվել են Հայաստանում 1999 թ.–ին, որոնց մասնակցել են 23 երկրներ ներկայացնող մարզիկներ, երկրորդ խաղերն անցկացվել են 2001 թ.–ին, երրորդը` 2003 թ.–ին, չորրորդը` 2007 թ.–ին, հինգերորդը` 2011 թ.–ին, վեցերորդը`2015 թ.–ին։

Ձմեռային առաջին համահայկական խաղերն անցկացվել են Ծաղկաձորում 2014 թ.–ի փետրվարի 24–ից մարտի 2–ը։ Խաղերին մասնակցել են աշխարհի 11 երկրների 22 քաղաքները ներկայացնող մոտ 400 մարզիկներ։ Խաղարկվել են 13 կոմպլեկտ մեդալներ դահուկավազքում, լեռնադահուկային մարզաձևում, սնոուբորդում, խաղարկվել է նաև Հոկեյի գավաթը։ –0–