ՀՖՖ–ն արձագանքեց հավաքականի կազմում այլևս հանդես չգալու մասին Արզումանյանի հայտարարությանը

ԵՐԵՎԱՆ, 9 մարտի. /Նովոստի–Արմենիա/. Հայաստանի ֆուտբոլի ֆեդերացիան մեկնաբանել է հավաքականի և Կարագանդայի «Շախտյորի» կենտրոնական պաշտպան Ռոբերտ Արզումանյանի հայտարարությունն ազգային հավաքականում այլևս հանդես չգալու մասին։

«ՀՖՖ նախագահ Ռուբեն Հայրապետյանը բազմիցս հայտարարել է, իր վերջին հարցազրույցներում էլ կրկնել է, որ այն ֆուտբոլիստները, որոնք ամբողջ էությամբ նվիրված չեն Հայաստանի ազգային հավաքականին, պատվախնդրորեն չեն մոտենում ազգային թիմին, չեն հրավիրվելու, որովհետև Հայաստանի ազգային հավաքանն ուրիշ արժեք է», – «Նովոստի–Արմենիա» գործակալությանը մեկնաբանեցին ՀՖՖ–ի մամուլի ծառայությունից։ 

ՀՖՖ նախագահ. ալբանացիների հետ խաղում դավաճանություն է տեղի ունեցել>>

Հաղորդագրության մեջ նշվում է, որ այդ ամենի գիտակցությունը պետք է ունենան բոլոր ֆուտբոլիստները։

«Հավաքականում դավաճանություն փնտրելը որևէ արդյունք չի տալու». ՀՖՀ առաջատարների հայտարարությունը>>

«Եթե Ռոբերտ Արզումանյանն այդպիսի որոշում է ընդունել, հավանաբար հասկացել է Հայաստանի ֆուտբոլի ֆեդերացիայի նախագահի արտահայտությունների իմաստը», – նշվում է հաղորդագրության մեջ։

Ավելի վաղ news.am–ին տված հարցազրույցում Արզումանյանը հայտարարել է, որ դադարեցնում է իր ելույթները Հայաստանի հավաքականում։ Պաշտպանը, ով ազգային հավաքականի կազմում խաղացել է 74 հանդիպում, իր որոշումը բացատրել է ՀՖՖ–ի կողմից իր և գործընկերներին հասցեագրված «անհիմն մեղադրանքներով»։–0–