«Ճանապարհ դեպի Ռիո». ծանրորդ Սոնա Պողոսյան

ԵՐԵՎԱՆ, 1 օգոստոսի. /Նովոստի–Արմենիա/. Ռիո դե Ժանեյրոյի 31-րդ ամառային Օլիմպիական խաղերից առաջ Հայաստանի ազգային օլիմպիական կոմիտեն շարունակում է «Ճանապարհ դեպի Ռիո» նախագիծը, որի շրջանակում ներկայացնում է օլիմպիական խաղերում Հայաստանը ներկայացնող մարզիկներին և նրանց օլիմպիականների լուսանկարները։

Մեր նախագծի հաջորդ հերոսը հավաքականի ամենակրտսեր անդամներից մեկն է` ծանրորդ Սոնա Պողոսյանը: Ծանրամարտի` Հայաստանի կանանց հավաքականում քիչ-քիչ, բայց հստակ քայլերով իր տեղն է ամրագրում Պողոսյանը:



Սոնան ծնվել է 1998 թվականին Քասախում: Ծանրամարտով զբաղվում է 13 տարեկանից:



Սոնան մասնակցել է նաև պատանեկան Օլիմպիական խաղերին և հիմա էլ`ընդամենը 18 տարեկանում, մասնակցելու է Օլիմպիական խաղերին: Սոնան սիրում է կարդալ, սիրում է իր գործը և հստակ գիտի իր ուժերի սահմանը:



-Խաղերին ի՞նչ թալիսման ես հետդ տանելու:

-Առարկա չունեմ, որ թալիսման է, սակայն կա մեկն, ով ինձ հետ չէ: Հիշում եմ նրան, կարծես` օգնում է այդ պահերին ինձ:



-Նկարագրիր Օլիմպիական խաղերը երեք բառով:

-Երազանք, մեծ աշխատանք և ինչ-որ տեղ նաև հաղթանակ:



-Ու՞մ կուզեիր կողքիդ կամ հանդիսատեսի շարքում տեսնել:

-Այն մարդուն, ում նվիրում եմ հաղթանակներս՝ թալիսմանիս:



-Ո՞ւմ հետ ես առաջինը կիսելու հաջողությունդ:

-Այն մարդկանց հետ, ովքեր հպարտանում և ուրախանում են իմ հաղթանակներով:



-Ինչպե՞ս կուզես, որ հիշվեն այս Օլիմպիական խաղերը:

-Որպես մեր մարզիկների հաջող և մեդալաշատ խաղեր: -0-