ԵՐԵՎԱՆ, 14 մայիսի. /Նովոստի-Արմենիա/. Նիկոտինամիդ ռիբոզիդ (NR) վիտամինը կարող է ծերացման կանխարգելման միջոց դառնալ։ Այսպիսի եզրակացության են եկել Լոզանի դաշնային պոլիտեխնիկ դպրոցի գիտնականները, որոնց հետազոտությունը հրապարակվել է Science ամսագրում։
Լաբորատոր մկների վրա անցկացված գիտափորձերի արդյունքներով, NR-ը նպաստում է մկանային հյուսվածքի վերականգնմանը և կյանքի տևողության ավելացմանը։
Հետազոտողների խմբի ղեկավարը մեկնաբանել է, որ այդ աշխատությունը կարող է դառնալ ռեգեներատիվ բժշկության վերաիմաստավորման փուլերից մեկը, ավելացնելով, որ մի օր հնարավոր կլինի վերականգնել կորցրած հյուսվածքները սովորական սննդային հավելումների, այլ ոչ թե վիրաբուժական վիրահատությունների միջոցով։
Ինչպես և մյուս բոլոր կենդանիները, մարդիկ կյանքի ընթացքում մշտապես բջիջներ են կորցնում սենեսցենցիայի (բջիջների ռեպլիկատիվ ծերացման) հետևանքով։ Երիտասարդության տարիներին օրգանիզմը հաջողությամբ փոխարինում է մեռնող բջիջները նորերո՝ խթանելով ցողունային բջիջների զարգացումն ու մասնագիտացումը, բայց հասուն տարիքում այդ գործընթացը դանդաղում է, ինչը հանգեցնում է հյուսվածքների մաշվածության։
Մկները, որոնց NR էին տալիս, ցույց են տվել ավելի մեծ թվով մկանային ցողունային բջիջներ առաջացնելու ընդունակություն, այդ բջիջները զարգացել են և պահպանել մկանների տոնուսը։
Այդ կենդանիները նաև ավելի երկար են ապրել, քան նրանց համացեղակիցները հավասար այլ պայմաններում։ Գիտնականները նշել են, որ NR-ի ընդունումը կրծողների օրգանիզմում կողմնակի ազդեցություններ չի առաջացրել, բայց վիտամինի ազդեցությունը մարդու օրգանիզմի վրա առայժմ չի ուսումնասիրվել, այդ իսկ պատճառով ծերացման կանխարգելման համար դրա կիրացման մասին խոսելը վաղ է: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում