Հայաստանում իրավախախտ երեխաների շրջանում առավել տարածված է գողությունն ու խուլիգանությունը. փորձագետ

Հայաստանում անչափահաս իրավախախտների մասնակցությամբ հանցագործությունների մեծ մասը բաժին է հասնում գողություններին և խուլիգանությանը, երեքշաբթի տեղեկացրել է ԵՊՀ Սոցիոլոգիայի ֆակուլտետի դասախոս Յուլիանա Մելքոնյանը:

«Մենք մոնիտորինգ ենք անցկացրել, որի շրջանակներում 11 մասնագետ ներկա է գտնվել անչափահաս իրավախախտների գործով 43 դատական գործընթացների Երևանում, Գյումրիում և Վանաձորում: Դիտորներն օգնել են հավաքել ոչ միայն քանակական, այլև որակական տեղեկություն», - ասաց սոցիոլոգը մամուլի ասուլիսի ընթացքում:

Միջոցառման շրջանակներում ներկայացվեցին 43 դատական գործերով արված ուսումնասիրությունների արդյունքները՝ անչափահասների նկատմամբ արդարադատության համակարգում հիմնական թերությունների և բացթողումների բացահայտման նպատակով: Մոնիտորինգն անցկացրել են ԵՊՀ սոցիոլոգները «Քաղաքացիական հասարակության ինստիտուտ» ՀԿ-ի և ԵԱՀԿ երևանյան գրասենյակի աջակցությամբ:
Մելքոնյանի խոսքով՝ ուսումնասիրությունների արդյունքում պարզվել է, որ Հայաստանում անչափահասների շրջանում հանցագործությունների 98 տոկոսը կատարում են տղաները, հանցագործությունների 62 տոկոսը կատարվում է մայրաքաղաքում:

«Երեխաներից շատերն իրավախախտման պահին չեն գիտակցում, որ հանցագործություն են կատարում և պատժվելու են դրա համար: Հաճախ երեխաներն անուղղակի կերպով են մասնակցում հանցագործություններին մեծահասակների ճնշման տակ», - նշեց Մելքոնյանը:
«Քաղաքացիական հասարակության ինստիտուտի» ղեկավար Արման Դանիելյանն իր հերթին նշեց, որ Հայաստանում ընդհանուր առմամբ անչափահասների շրջանում հանցավորությունն ավելի տարածված է, քան շատ այլ երկրներում:

«Չնայած այս ամենին, հարկավոր է բարեփոխել արդարադատության համակարգն անչափահասների նկատմամբ՝ գ այս ոլորտում մասնագիտացած դատավորների, քննիչների, մասնագետների մասնակցությամբ, ովքեր կօգտագործեին անչափահաս իրավախախտների հետ աշխատանքի հատուկ մոտեցումներ և մեթոդներ», - նշեց Դանիելյանը:

Նրա խոսքով՝ նման համակարգ արդեն վաղուց կիրառվում է Եվրոպայի շատ երկրներում և բավականին արդյունավետ է:
ԵԱՀԿ երևանյան գրասենյակի մարդու իրավունքների հարցերի պատասխանատու Վլադիմիր Չունտուլովն իր հերթին ավելացրեց, որ այս ուսումնասիրության արդյունքները նպաստում են այս ոլորտի հիմնական խնդիրների արագ լուծմանը՝ միջազգային չափորոշիչներին համապատասխանեցնելով անչափահասների նկատմամբ կիրառվող բոլոր օրենքներն ու իրավական նորմերը:

«Հանցագործություն կատարած երեխաները պաշտպանության կարքի ունեն ոչ միայն կառավարության, այլև հասարակության կողմից: Կանխարգելիչ միջոցներից բացի, հարկավոր է քննարկել նաև պատժի այլընտրանքային միջոցները, որոնք թույլ կտան մեղմել անչափահասների համար ազատազրկման պայմաններն ու ժամկետները», - ասաց Չունտուլովը:

Ոստիկանության տվյալներով՝ 2011 թ.-ի առաջին հինգ ամսվա ընթացքում Հայաստանում գրանցվել է անչափահասների կողմից կատարված 169 հանցագործություն, ինչը 15,9 տոկոսով պակաս է 2010թ.-ի նույն ժամանակահատվածի համեմատ:-0-