Փաշինյանը ցավակցական հեռագիր է հղել Կանադայի վարչապետին. կրակոցների հետևանքով 16 մարդ է զոհվել

ԵՐԵՎԱՆ, 20 ապրիլի․ /Նովոստի-Արմենիա/․ ՀՀ վարչապետ Նիկոլ Փաշինյանը ցավակցական հեռագիր է հղել Կանադայի վարչապետ Ջասթին Թրյուդոյին։ Այս մասին հայտնում է ՀՀ վարչապետի մամուլի ծառայությունը։

«Խորապես ցնցված եմ Նոր Շոտլանդիա նահանգում տեղի ունեցած վայրագ հանցագործության լուրից, որը 16 անմեղ զոհերի պատճառ դարձավ: Իմ անկեղծ ցավակցությունն եմ հայտնում Ձեզ և Կանադայի բարեկամ ժողովրդին այս աներևակայելի բռնարարքի կապակցությամբ, որը պատուհասած COVID-19 համավարակի դեմ պայքարի օրերին ցնցեց բոլոր կանադացիներին:
Խնդրում եմ զոհվածների ընտանիքներին և մտերիմներին փոխանցել սփոփանքի իմ խոսքերը՝ մաղթելով համբերություն և տոկունություն»,- նշված է վարչապետի հեռագրում:

Կանադայի Նոր Շոտլանդիա նահանգում տեղի ունեցած կրակոցների հետևանքով զոհվել է առնվազն 16 մարդ, այդ թվում՝ մեկ ոստիկան: Հարձակման մեջ կասկածվողը սպանվել է: Հաղորդվում է, որ նա ոստիկանի համազգեստ է հագել և տեղափոխվել մեքենայով, որը նման է ոստիկանականի: -0-