82-ամյա պապիկին պետական մակարդակով ուղեկցեցին Ծիծեռնակաբերդի հուշահամալիր (ՎԻԴԵՈ)
ԵՐԵՎԱՆ, 25 ապրիլի․ /Նովոստի-Արմենիա/․ ՀՀ կառավարության Facebook-յան էջում տեսանյութ է տեղադրվել, որտեղ 82-ամյա Արտուշ Միրզոյանին ապրիլի 24-ի լույս 25-ի գիշերը պետական մակարդակով ուղեկցում եմ Ծիծեռնակաբերդի հուշահամալիր` հարգանքի տուրք մատուցելու Հայոց ցեղասպանության զոհերի հիշատակին:
ՀՀ վարչապետ Նիկոլ Փաշինյանը Facebook-յան իր էջում կիսվել է այդ տեսանյութով և խնդրել՝ չկրկնել։
«Սահմանափակումները մտցված են միայն հանուն Ձեր առողջության։ Հատկապես մեր տարիքով հայրենակիցների»,- գրել է նա տեսանյութի մեկնաբանություններում։
Ավելի ուշ ՀՀ վարչապետի տիկին Աննա Հակոբյանը Facebook-յան իր էջում գրել է․
«Քիչ անց՝ մեր բոլորի սրտերը գերած Պապիկին, վարչապետի հանձնարարությամբ, պետական մակարդակով կուղեկցեն Ծիծեռնակաբերդի հուշահամալիր, և նա վերջապես իր ծաղիկները կխոնարհի Հայոց Ցեղասպանության զոհերի հիշատակին»։-0-
