Իրենց բնակավայրից ժամանակավորապես հեռու գտնվող դպրոցականները կկարողանան շարունակել իրենց կրթությունը․ ԿԳՄՍՆ

ԵՐԵՎԱՆ, 29 սեպտեմբերի․ /Նովոստի-Արմենիա/․ ՀՀ կրթության, գիտության, մշակույթի և սպորտի նախարարությունը կապահովի իրենց բնակավայրից ժամանակավորապես հեռու գտնվող դպրոցականների կրթության շարունակականությունը։ Այս մասին Facebook-յան իր էջում հայտնել է ՀՀ ԿԳՄՍ նախարարի տեղակալ Ժաննա Անդրեասյանը։

Նա նշել է, որ ՀՀ բոլոր դպրոցները, մարզպետարաններն ու Երևանի քաղաքապետարանն առաջին իսկ օրից տեղեկացված են այս մասին։ 

«Մասնավորապես, երեխաները կկարողանան դասերի մասնակցել այն ուսումնական հաստատությունում, որը գտնվում է տվյալ պահին իրենց փաստացի բնակության վայրին մոտ և հարմար է ուսումնական գործընթացից դուրս չմնալու և ուսումնական տարին առանց ընդհատման շարունակելու համար»,- ասվում է հաղորդագրության մեջ։ 

Փոխնախարարի խոսքով՝ երեխաները կընդգրկվեն ուսումնական գործընթացում՝ անկախ լիցենզիայով նախատեսված տեղերի թվից և այս պահին փաստաթղթերի առկայությունից։ Բոլոր դպրոցականները կապահովվեն անհրաժեշտ դասագրքերով։ 

«Խնդրում ենք, պաշտպանելով երեխաների անձնական տվյալների գաղտնիությունը սոցցանցերում, պարզապես ԴԻՄԵԼ ՄՈՏԱԿԱ ԴՊՐՈՑ»,- գրել է Անդրեասյանը։-0-