Հայաստանում գրիպից մարդ է մահացել

ԵՐԵՎԱՆ, 11 հունվարի․ /Նովոստի-Արմենիա/․ Երեկ Հայաստանում գրիպից մարդ է մահացել։ Այս մասին հայտնում է ՀՀ Առողջապահության նախարարության մամուլի ծառայությունը։ 

Ըստ նախարարության տեղեկության, աբորատոր հետազոտությունների արդյունքում հաստատվել է գրիպի Ա H1N1 ենթատեսակը: Դեպքի համաճարակաբանական հետազոտության արդյունքում պարզվել է, որ հիվանդը բժշկական օգնության է դիմել ծայրահեղ ծանր վիճակում, շնչահեղձությամբ՝ հիվանդության 10-րդ օրը: 

«Այսօր հանրապետության բժշկական կազմակերպություններում, սուր շնչառական վարակներով հոսպիտալացված է 668 հիվանդ (նախորդ տարվա համեմատ նվազում՝ 1,1 անգամ), որի 97,9%-ը կազմում են 0-18 տարեկան երեխաները: Հիվանդների դիմելիության հիմնական բեռը բաժին է ընկել Երևան քաղաքի մանկական ստացիոնարներին: Բոլոր հիվանդները ստանում են համապատասխան բուժում, ունեն լավացման դրական շարժընթաց: Բժշկական կազմակերպությունների վերակենդանացման բաժանմունքներում բուժում է ստանում 31 հիվանդ (նախորդ տարվա 50-ի փոխարեն), որոնց մեծամասնությունը կազմում են 0-5 տարեկան երեխաները»,- նշվում է հաղորդագրության մեջ։ 

Գրիպով չհիվանդանալու, ինչպես նաև հետգրիպային բարդություններից խուսափելու համար նախարարությունը խորյուրդ է տալիս սեզոնային գրիպի դեմ պատվաստում կատարել։ 

«Նշենք, որ հանրապետության բոլոր պոլիկլինիկաներն ապահովված են սեզոնային գրիպի պատվաստանյութով, և բոլոր նրանք ովքեր դեռ չեն ստացել սեզոնային գրիպի դեմ պատվաստում, կարող են դիմել իրենց հաշվառման պոլիկլինիկա և պատվաստվել: Պատվաստումները կատարվում են կամավորության սկզբունքով, անվճար, պետական պատվերի շրջանակներում, և առողջ ազգաբնակչությունը ևս կարող է ստանալ պատվաստում»,- հայտնում է ՀՀ Առողջապահության նախարարությունը։-0-