Facebook–ում և Instagram–ում օգտահաշիվների իսկության ստուգումը վճարովի կդառնա

ԵՐԵՎԱՆ, 20 փետրվարի./Նովոստի–Արմենիա/. Օգտահաշիվների իսկության վճարովի ստուգման հնարավորություն կհայտնվի Facebook-ում և Instagram-ում։

Այս մասին կիրակի հայտարարել է ընկերության ղեկավար Մարկ Ցուկերբերգը։

«Այս շաբաթ մենք սկսում ենք ներդնել Meta Verified ֆունկցիան, որը բաժանորդային ծառայություն է։ Այն թույլ կտա աստատել ձեր օգտահաշիվն անձը հաստատող պետական ID-ով, ստանալ կապույտ նշան, լրացուցիչ պաշտպանություն ձեր անձը կեղծող հաշիվներից և ուղիղ կապ հաճախորդների սպասարկման ծառայության հետ», – գրել է Ցուկերբերգը Facebook–ում։

Ցուկերբերգը նաև նշել է, որ օգտահաշվի իսկության ստուգման արժեքը կկազմի ամսական 11,99 դոլար՝ վեբ տարբերակի համար և ամսական 14,99 դոլար՝ iOS շարժական սարքերի համար:

«Այս շաբաթ մենք այն (նոր ֆունկցիան) կգործարկենք Ավստրալիայում և Նոր Զելանդիայում, իսկ շուտով արդեն` մյուս երկրներում», – գրել է Ցուկերբերգը։-0-